Keppnislið í Formúlu 1 æfðu á Sepang brautinni í nótt í tvígang og
skiptust Felipe Massa á Ferrari og Lewis Hamilton á McLaren á því að ná
besta tíma. Hamilton vann fyrsta mót ársins og hefur því forystu í
stigakeppni ökumanna.
Verr gekk þó hjá Skotanum David Coulthard hjá Red Bull. Hann þeyttist útaf
brautinni og framfjöðrunin sundraðist þegar hann keyrði á brautarkant.
Dómarar á vegum alþjóðabílasambandsins vilja fá formlegar skýringar á því
frá Red Bull afhverju fjöðrunin hrökk í sundur og hvað réttlæti frekari
þátttöku liðsins, þegar öryggissjónarmið eru höfð að leiðarljósi.
Margir ökumenn voru í vandræðum með bíla sína, en þeir eru enn að venjast
banni við notkunn spólvarnar, sem hjálpað hefur þeim við aksturinn síðustu
ár. Bein útsending frá lokæfingum og tímatökunni í Malasíu eru á Stöð 2
Sport í nótt. Endursýnt verður frá æfingum Formúlu 1 liða frá því í nótt í dag og einnig verður óhapp Coulthard sýnt í hádegis og kvöldfréttum á Stöð 2.
Verður Red Bull bíllinn bannaður?
