Riftu samningi við Pálma Gunnars og félaga

Veiðifélag Eldvatns hefur rift samningi við Verndarsjóð sjóbirtingsins, sem Pálmi Gunnarsson tónlistarmaður er meðal annars í forsvari fyrir. Veiðipressan greindi frá þessu í morgun. Veiðivísir hefur heimildir fyrir því að mikil átök hafi verið á aðalfundi veiðifélagsins fyrir skömmu.

Eins og Veiðivísir greindi frá 29. janúar þá bárust upphaflega þrjú tilboð í Eldvatn. Unubót, óstofnað veiðifélag, var með hæsta tilboðið en það hljóðaði upp á um 5 milljónir króna (á ári). Verndarsjóður sjóbirtingsins bauð um 4 milljónir króna í ána og Hreggnasi um 2 milljónir. Taka verður inn í reikninginn að tilboðin voru með ýmsum ákvæðum, meðal annars um ræktun árinnar og svo fram eftir götunum.

Þann 27. febrúar var síðan greint frá því á Veiðivísi að Veiðifélag Eldvatns hefði samið við Verndarsjóðinn til 7 ára og var leiguverðið í kringum 4 milljónir króna á ári eða um 28 milljónir fyrir samningstímann. Í forsvari fyrir Verndarsjóðinn eru fjórir menn, það eru Pálmi Gunnarsson tónlistarmaður, Jón Ingvar Ragnarsson bæklunarlæknir, Guðmundur Hilmarsson flugstjóri og Þórarinn Blöndal myndlistarmaður.

Átök á aðalfundi og formannsskipti

Heimildir Veiðivísis herma að töluverð átök hafi orðið á aðalfundi Veiðifélags Eldvatns nú í byrjun mánaðarins - fyrst og fremst vegna samningsins sem gerður hafi verið við Verndarsjóðinn. Jón Sigurgrímsson, sem verið hafði formaður félagsins og haft milligöngu um samninginn við Pálma og félaga, sagði á fundinum af sér sem formaður.

Nú hefur Guðbrandur Magnússon tekið við formennsku í félaginu. Samkvæmt heimildum Veiðivísis mun Veiðifélagið nú ganga til samninga við Unubót.

Jón Sigurgrímsson vildi ekkert tjá sig um málið þegar Veiðivísir hafði samband heldur benti á Guðbrand en ekki hefur náðst í hann í dag.

[email protected]