Sannleikurinn: Bankamenn dæmdir í áralangt frítt fæði og húsnæði

Dómur var kveðinn upp í Al-Thani málinu nú rétt í þessu þegar Símon Sigvaldason héraðsdómari las upp dómsorð. Fyrir mistök við prentun dómsins voru ákærðu fyrst dæmdir í „Saga Faxaflóarhafnar gerð skil með einstökum hætti“ en það var leiðrétt stuttu síðar.

Hreiðar Már Sigurðsson, fyrrverandi forstjóri Kaupþings, var dæmdur í fimm og hálfs árs launalaust leyfi í fríu húsnæði og fæði. Hreiðar Már þurfti jafnframt að greiða málsvarnarlaun verjanda síns, alls 33,4 milljónir króna sem hlýtur að vera sárt miðað við gagnið sem það gerði.

Sigurður Einarsson, fyrrverandi stjórnarformaður Kaupþings, var dæmdur í fimm ára launalaust leyfi í fríu húsnæði og fæði. Hann þarf jafnframt að vera tík höfuðpauranna í Stokkseyrarmálinu í allavega 2 ár. Einnig að greiða málsvarnarlaun verjenda, Gesti Jónssyni, sem sagði sig frá málinu sl. vor 10,8 milljónir króna og Ólafi Eiríkssyni 3,5 milljónir króna. Hann sleppur því töluvert betur fjárhagslega en Hreiðar Már sem segir manni að maður á alltaf að fá tilboð frá verjendum í stórum markaðssvikmálum.

Ólafur Ólafsson fjárfestir hlaut þriggja og hálfs árs uppihald á kostnað ríkisins. Þá þurfti hann að greiða málsvarnarlaun verjanda síns Þórólfs Jónssonar, 14,8 milljónir króna og verjanda sem sagði sig frá málinu, Ragnari Hall 5,8 milljónir. Þeir eiga því fyrir jólagjöfum í ár annað en atvinnulausir en þeim var tilkynnt í dag að þeir fá ekki desemberuppbót.

Magnús Guðmundsson, fyrrverandi forstjóri Kaupþings í Lúxemborg var dæmdur til að leika jólasvein í desember en hann er fæddur í hlutverkið.

Hæstaréttarlögmennirnir Ragnar H. Hall og Gestur Jónsson voru dæmdir til að greiða eina milljón króna í réttarfarssekt hvor fyrir að hegða sér eins og fífl og tefja með heimskulegri fléttu þegar þeir sögðu sig frá málinu.

Fréttastofa mun reglulega birta myndir af þeim á næstu dögum svo við getum nú öll alveg örugglega híjað á þá og hlegið í skammdeginu.



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu sem hefur aldrei verið dæmd fyrir neitt.