„Já, auðvitað hlýtur maður að fagna þessu," segir Jóhann Páll Jóhannsson, blaðamaður DV. Jóhann Páll var annar tveggja blaðamanna DV sem skrifaði mest um lekamálið svokallaða. Jóhann og Jón Bjarki Magnússynir, hafa flutt fréttir af málinu í um það bil ár
„Ráðherrann hefur barist um á hæl og hnakka í heilt ár, grafið undan trausti og trúverðugleika hverrar stofnunarinnar á fætur annarri, kastað skít og drullu yfir landlaust fólk, embættismenn og blaðamenn, allt með dyggum stuðningi tveggja stjórnmálaflokka sem gáfu valdníðslu hennar heilbrigðisvottorð, ýmist með beinum eða óbeinum hætti. Þegar litið er yfir árið vona ég að einhverjir skammist sín,“ bætir Jóhann Páll við
Hann segist vona að einhver lærdómur verði dreginn af málinu:
„Vonandi getur lekamálið orðið einhvers konar skólabókardæmi um skaðann sem stjórnmálamenn geta valdið með því að hlaupast undan pólitískri ábyrgð. Hanna Birna hefur stórskaðað stjórnsýsluna og vantraustið hefur eitrað út frá sér. Þetta eru afleiðingar þess að hún, og ýmsir af kollegum hennar, litu svo á að það væru einhvers konar mannréttindi hennar að fá að gegna ráðherraembætti fram í rauðann dauðann.“
