Veiðikort í verðlaun fyrir skemmtilegar veiðifréttir

Eins og lesendur hafa tekið eftir er Veiðivísir heldur betur kominn úr vetrardvala og framundan er vonandi skemmtilegt veiðisumar hjá öllum.

Við viljum endilega segja frá veiðum af sem flestum svæðum og þá skiptir engu máli hvort verið er að veiða lax, silung eða annað sem getur bitið á færið.  Við hvetjum þess vegna alla veiðimenn á öllum aldri að vera duglegir með myndavélarnar sem fyrr við ár- og vatnsbakkann í sumar og senda okkur myndir úr veiðitúrnum ykkar ásamt frá frásögn af veiðinni.  Mikilvægt er að með póstinum fylgi nafn og upplýsingar um sendanda því allar þær fréttir og myndir sem við birtum fara í pott og við drögum vikulega úr öllum innsendum myndum.  Ef myndin og veiðisagan þín er ekki valin þá viku sem þú sendir hana skaltu er hún áfram í pottinum og gefur þér þess vegna áfram möguleika á vinning.

Við drögum vikulega út Veiðikort en í lok sumars drögum við aftur úr stóra pottinum og þá eiga allir sem hafa sent inn myndir möguleika á veiðileyfi í haustveiði í einni af vinsælustu laxveiðiánum.  Okkur hlakkar til að sjá veiðimyndirnar ykkar og heyra af veiðum ykkar í sumar.  Sendið okkur póstinn á [email protected]

Góða veiði og gleðilegt sumar!