Myndirnar í aðalverðlaunaflokki RIFF

Alþjóðleg kvikmyndahátíð í Reykjavík, RIFF, hefst með pompi og prakt þann 24. þessa mánaðar.

Í dag er tilkynnt um hvaða myndir eru í aðalverðlaunaflokki hátíðarinnar, Vitranir.

Verkin sem valin eru í flokkinn eiga það sameiginlegt að ögra viðteknum gildum í kvikmyndagerð en þær eiga það að auki sameiginlegt að vera fyrsta eða annað verk leikstjóranna. Alls keppa tólf nýir leikstjórar um aðalverðlaunin, hinn Gullna lunda, og eru allar myndirnar sýndar í fyrsta sinn á Norðurlöndum á hátíðinni.

Meðal þeirra mynda sem keppa er Krisha eftir bandaríska leikstjórann Trey Edward Shults. Myndin fjallar um Krisha, sem snýr aftur til fjölskyldu sinnar eftir langvarandi baráttu við Bakkus og afleiðingarnar sem endurkoma hennar hefur á fjölskylduna. Myndin vann til dómnefndar- og áhorfendaverðlauna á South by South­west-hátíðinni í ár.

Þrestir eftir Rúnar Rúnarsson verður frumsýnd á Íslandi á hátíðinni í ár og tekur einnig þátt í keppnisflokknum. Rúnar er ekki ókunnur flokknum en hann hlaut Gullna lundann árið 2011 fyrir myndina Eldfjall.

Einnig verður kanadíska myndin Sleeping Giant eftir Andrew Cividino sýnd. Hún segir frá unglingspilti sem kynnist tveimur frændum í sumarfríi en þegar hann kemst að sársaukafullu leyndarmáli reynir á vinskapinn. Myndin var valin besta verk upprennandi leikstjóra á kvikmyndahátíðinni í München.

Að loknum sýningum á myndunum munu leikstjórarnir sitja fyrir svörum.

Formaður dómnefndar í ár er Fred­erik Boyer, sem starfar sem listsrænn stjórnandi kvikmyndahátíðarinnar í Tribeca og Les Arcs í Frakklandi, Agnes Johansen kvikmyndaframleiðandi, Laufey Guðjónsdóttir, framkvæmdastjóri Kvikmyndamiðstöðvar, Dagmar Borelle og Paola Corvino.

Hér má sjá þær myndir sem keppa um Gullna lundann:



As I Open My Eyes / À peine j'ouvre les yeux - Leyla Bouzid FRA/TUN/BEL/ARE

Túnis, sumarið 2010, skömmu fyrir byltinguna. Farah er 18 ára. Hún er nýútskrifuð og fjölskyldan vonast til að hún fari í læknanám. Farah er ekki jafnviss; hún syngur í pólitískri rokkhljómsveit, elskar lífið og að detta í það. Hún kannar ástina og stórborgina að næturlagi, allt í óþökk móður sinnar sem gjörþekkir Túnis og hættur hennar.

Babai – Visar Morina KOS/DEU 



Nori er útsjónarsamur tíu ára drengur sem framfleytir sér með því að selja vindlinga á götum Kósóvó ásamt föður sínum Gesim. Hart er í ári og þegar feðgarnir hafa ekki í nein hús að venda heldur Gesim til Þýskalands í von um betra líf. Nori er staðráðinn í að fylgja föður sínum og heldur einn síns liðs í hættuför gegnum Evrópu í leit að honum. 

Barash - Michal Vinik ISR

Þegar ný stelpa með öðruvísi hágreiðslu byrjar í skólanum breytist líf Na’ama Barash. Hún er 17 ára og grútleiðist úthverfalífið með fjölskyldu sinni. Nýja stelpan kynnir hana aftur á móti fyrir spennandi heimi fíkniefna, lesbía og kynlífs. Skyndilega er lífið spennandi og allar hugmyndir hennar um heiminn gætu breyst.

Krisha – Trey Edwars Shults USA



Krisha snýr aftur til fjölskyldu sinnar eftir langa baráttu við fíkn. Það sem hefst sem fallegur vitnisburður um vilja og getu fjölskyldunnar til að fyrirgefa snýst fljótt upp í andhverfu sína þegar gömul sár rifna upp og gremja brýst upp á yfirborðið. Vann bæði dómnefndar- og áhorfendaverðlaun á South by Southwest hátíðinni 2015. 

Mediterranea - Jonas Carpignano ITA/FRA/USA/DEU/QAT



Tveir vinir ferðast frá Burkina Faso til Ítalíu í leit að betra lífi. En líf innflytjandans er erfiðara en þeir bjuggust við. Ayiva aðlagast vel og er boðinn velkominn á heimili vinnuveitanda síns. Abas þarf hins vegar að glima við mun erfiðari aðstæður. Myndin hlaut ‘One Future’ verðlaunin á kvikmyndahátíðinni í München.

Motherland / Ana Yurdu - Senem Tüzen TUR/GRC 



Þegar Nesrin snýr aftur í þorp foreldra sinna til að ljúka við skáldsöguna sína og uppfylla drauminn um að verða rithöfundur bankar íhaldssöm móðir hennar óvænt upp á og neitar að fara. Mæðgurnar neyðast því til að horfast í augu við myrkrið í sálu hvorrar annarrar. Myndin hlaut verðlaun í Istanbúl og Thessaloniki meðan hún var enn á þróunarstigi.

Sleeping Giant – Andrew Cividino CAN

Sumarfríið verður heldur líflegra þegar táningurinn Adam vingast við frændurna Riley og Nate sem sukka og stökkva fram af klettum. Þegar upp kemst um sársaukafullt leyndarmál reynir mjög á vinskapinn og drengirnir verða aldrei samir. Valin besta myndin eftir upprennandi leikstjóra á kvikmyndahátíðinni í München.

Slow West - John McClean GBR/NZL

Jay er ungur Skoti sem ferðast þvert yfir Bandaríkin í leit að Rose, konunni sem hann elskar. Á ferð sinni kynnist hann útlaganum Silas sem slæst í för með honum sem leiðsögumaður. Jay veit ekki að Rose er eftirlýst og fé sett til höfuðs henni, lífs eða liðinni. Myndin vann dómnefndarverðlaunin á Sundance kvikmyndahátíðinni 2015.

Þrestir – Rúnar Rúnarsson ICE/DEN/CRO

Þrestir er dramatísk mynd sem fjallar um 16 ára pilt sem sendur er á æskustöðvarnar vestur á firði til að búa með föður sínum sem hann hefur ekki séð í ein sex ár. Síðasta mynd Rúnars, Eldfjall, vann til 18 stórverðlauna um heim allan og þar á meðal hlaut hún Gullna lundann á RIFF árið 2011.

The Here After / Efterskalv - Magnus von Horn SWE/POL

John snýr aftur á heimili föður síns eftir dvöl í fangelsi fyrir ástríðuglæp sem hann framdi sem bráðlátur unglingur. Nú vill hann snúa baki við fortíðinni og reyna að aðlagast að nýju samfélaginu sem hann kvaddi með svo afdrifaríkum hætti nokkrum árum fyrr. En það eru ekki allir jafn tilbúnir til að fyrirgefa. 

We Monsters / Wir Monster - Sebastian Ko GER

Skömmu eftir að Paul og Christine skilja gera þau sér grein fyrir áhrifunum á unglingsdóttur þeirra Söruh. Hún verður óstýrilát og vís til alls, meðal annars að myrða bestu vinkonu sína. Þau reyna að vernda dóttur sína með því að hylma yfir glæp hennar. Þannig sameinast fjölskyldan á ný en sektarkennd, lygar og launráð varða veg þeirra til glötunar. 

Wednesday May 9 / Chaharshanbeh, 19 Ordibehesht - Vahid Jalilvand IRA

Óvenjuleg auglýsing í dagblaði í Tehran stefnir saman aragrúa fólks sem telur að auglýsingin sé lausn vandamála sinna. Lögreglan tekur við að dreifa mannfjöldanum og ná stjórn á stöðunni. En tvær konur í hópnum ætla ekki að gefast upp.