Ein ljósmynd breytti lífi Kristófers Helgasonar

Ein ljósmynd varð til þess að útvarpsmaðurinn Kristófer Helgason er nú í besta formi lífs síns. Honum þótti fátt betra en að liggja uppi í sófa með sælgæti og snakk en eftir að hafa séð myndina sumarið 2012 rann það upp fyrir honum að aðgerða væri þörf. Kristófer starfar sem kennari hjá World Class í dag.

Hætti að reykja og byrjaði að borða

„Þegar ég hætti að reykja þá byrja ég að borða meira og þá fer ég að fitna og safna á mig kílóum., Það heldur síðan áfram þannig að fyrir sjö árum síðan er ég í sófanum heima með kartöfluflögur í annarri og kók í hinni, vaki fram eftir kvöldi, er í nammiskúffunni langt fram eftir kvöldi og sofna seint,“ segir Kristófer, en hann hætti að reykja fyrir 25 árum síðan.

Sumarið 2012 rann það upp fyrir honum að aðgerða væri þörf, en það var ein ljósmynd sem breytti öllu.

„Þegar ég skoða myndina þá bregður mér. Það hefur ekki gerst áður. Þó ég hafi séð margar slæmar myndir af mér í gegnum tíðina þá var eitthvað við þessa mynd sem fékk mig til þess að segja hingað og ekki lengra.“

Valdi spretthlaupið fram yfir langhlaupið, þvert á ráðleggingar

Kristófer hafði samband við Ívar Guðmundsson, vin sinn og vinnufélaga, sem kom honum af stað. „Ég vissi að hann gæti þetta léttilega, því þegar hann gerir eitthvað þá gerir hann það rúmlega 100 prósent. Bara eins og þegar hann hætti að reykja fyrir mörgum árum, þá fór hann alla leið. Ég sagði að vísu við hann að þetta væri svolítið langhlaup en hann ákvað að hafa þetta svolítinn sprett,“ segir Ívar.

Kristófer segir allt hafa breyst. Ræktin var tekin föstum tökum, en Kristófer ákvað að mæta sex sinnum í viku í ræktina – og stóð við það. Þá tók hann mataræðið fullkomlega í gegn og hugaði vel að svefninum. Hann viðurkennir að það henti sér vel að fara öfgafullar leiðir í lífinu.

Náði markmiðinu fyrir settan tíma

„Ég tók út allan sykur, allt nammi, snerti ekki nammi, tók út allar mjólkurvörur nema skyr en ég leitaði í próteinið í því. Tók út brauð og markmiðið var á þeim tíma að ná mér niður í þyngd og að ná six pack-i fyrir jólin – svolítið bratt markmið kannski,“ segir hann. Markmiðið náðist og gott betur en það.

„Ég náði six pack-i töluvert fyrir markmiðið þannig á jólunum þá var hann kominn.“

Kristófer segir aðspurður að til þess að ná svona árangri þurfi bæði að huga að hreyfingu og mataræði. „Það er ekki nóg að fara bara í ræktina. Það þarf að taka allan pakkann og mataræðið með. Mataræðið er lágmark áttatíu prósent af þessu.“

Hægt er að sjá viðtalið við Kristófer í heild í spilaranum hér fyrir neðan. Það er tekið í tilefni af Meistaramánuðinum en fjölmargir Íslendingar taka nú þátt í átakinu þar sem markmiðið er sett á að bæta lífsstílinn og öðlast betri heilsu.