Ölvaður ökumaður hótaði lögreglu
Tilkynnt var um ölvaðan ökumann í miðbæ Hafnarfjarðar um rétt fyrir hádegi í dag.
Bifreið mannsins fannst mannlaus og skemmd, en henni hafði verið ekið á vegkant og vegrið með þeim afleiðingum að hún varð óökufær.
Með aðstoð vitna höfðu lögreglumenn upp á ökumanninum skömmu síðar.
Ökumaðurinn var handtekinn, grunaður um akstur undir áhrifum áfengis og fíkniefna, vörslu fíkniefna, fyrir hótanir gegn lögreglumönnum og fleira.
Maðurinn verður vistaður í fangageymslu þar til hægt verður að yfirheyra hann.
