Jón Viðar hraunar yfir Kötlu: Ein og hálf stjarna

Jón Viðar segir þáttinn „mesta fyrirgang sem sést hafi í íslensku sjónvarpi“ - Katla fær einkunnina 2 á skalanum 1 til 10 hjá gagnrýnandum þrautreynda. Af fimm stjörnum fengi hún eina og hálfa, skrifar hann á Facebook.

Allir átta þættir fyrstu seríunnar birtust á Netflix á þjóðhátíðardaginn og hafa almennt vakið jákvæð viðbrögð áhorfenda. Á IMDB eru stjörnurnar 7,7 af 10.

Jón Viðar tekur síst undir þann dóm almennings, og gengur svo langt að segjast sjá á eftir þjóðhátíðarkvöldinu sem fór í að horfa á þáttinn. Hann talar um ærandi hávaða, yfirþyrmandi tónlist og læti.

„Leikmynd og myndataka auðvitað smart eins og við er að búast - en til hvers er að vera smart ef hið mannlega drama nær ekki máli - og því fer víðs fjarri að það geri það hér.“

Sagan er að sögn Jóns Viðars þunglamaleg og dugar ekki í sjónvarpsseríu.

„Síðasti þátturinn, þegar höfundurinn hnýtir loks saman þræðina sem hafa verið að þvælast hver um annan í fyrri þáttum, er svo stórkostlegt melódrama að leitun er á öðru eins, jafnvel í hinni fábrotnu og á margan hátt ófrumlegu kvikmyndamenningu okkar Íslendinga.“

Þótt hinn leikræni þáttur sé góður að mati Jóns Viðars er lokaeinkunn sú sem að ofan er getið. Framleiðslan er eins og gefur að skilja í Netflix-verkefni á nokkuð háu plani en Jón Viðar telur að farið hafi fé betra.

„Það er sorglegt að sjá svona mikilli fagkunnáttu og svona miklum fjármunum sóað í svo lítilfjörlegt efni.“

Í grein á Vísi í dag var tekin saman gagnrýni úr ýmsum áttum. Þar lofuðu margir umhverfið, jökulinn og drungann, en að sama skapi var algengt að rætt væri um að efnið væri helst til seigfljótandi og krefðist nokkurrar þolinmæði af áhorfandanum.

Katla er sálfræðilegur vísindaskáldskapur úr smiðju Baltasar Kormáks og Sigurjóns Kjartanssonar og eru allir þættirnir á íslensku. Það eru Baltasar Kormákur, Börkur Sigthorsson og Thora Hilmarsdóttir sem leikstýra þáttunum.