Criis á eldi í stærsta sigri tímabilsins, 16–0.

Liðin mættust í Nuke kortinu þar sem Criis átti þrjár fellur í hnífalotunni til að tryggja Ármanni varnarsætið í fyrri hálfleik. Criis kom inn í hópinn fyrir Lambo en á þar síðasta tímabili lék Criis með SAGA.

Criis hélt innisvæðinu fyrir Ármann og átti stóran þátt í því að liðið vann fyrstu lotuna í leiknum og var hann hreint út sagt ótrúlegur í gegnum allan leikinn. Í slagtogi við Hundza bjargaði hann þriðju lotunni fyrir horn. Framan af í leiknum voru loturnar gjarnan tæpar en alltaf tókst Ármanni að sigra á síðustu stundu.

Svo fór að TEN5ION vann ekki eina einustu lotu í fyrri hálfleik. Ármann lék upp á sitt allra besta gegn ótrúlega einhæfu liði TEN5ION. Í fyrri hálfleik var það eina sem TEN5ION bauð upp á það að pressa úti, reyna að finna fellur, ýta Ármanni aftur og fara þá inn. Þar tók Criis á móti þeim og stráfelldi trekk í trekk.

Aðrir leikmenn Ármanns voru einnig upp á sitt besta, Hundzi var Criis þéttur við hlið á meðan Vargur og Ofvirkur gátu unnið sína vinnu annars staðar á kortinu.

Staðan í hálfleik: Ármann 15 – 0 TEN5ION

Í hálfleik skiptu liðin um hlið, en síðari hálfleikur var sá stysti í sögu Ljósleiðaradeildarinnar. Ármann feikaði á rampinn, fór svo inn á sprengjusvæðið án þess að verða fyrir nokkrum skaða og þar sópuðu þeir TEN5ION upp til að tryggja sér sigur í leiknum.

Lokastaða: Ármann 16 – 0 TEN5ION

Niðurstaðan var því stórtap TEN5ION gegn Ármanni í gær, raunar eins stórt og það getur verið. Ármann styrkir því stöðu sína þar sem þeir nálgast toppliðin í deildinni, en enn hefur TEN5ION ekki haft neitt upp úr leikjum sínum

Næstu leikir liðanna:

Ármann–SAGA, fimmtudaginn 10. nóv, kl. 19.30

NÚ–TEN5ION, fimmtudaginn 10. nóv, kl. 20.30

Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.