Bílaleigurnar fá milljarð á þessu ári frá umhverfisráðuneytinu til að kaupa nýja rafmagnsbíla. Margir hafa klórað sér í hausnum vegna þessa.
Málið vakti hörð viðbrögð á samfélagsmiðlum í vikunni, ekki síst vegna breytinga á lögum um endurgreiðslu á virðisaukaskatti til rafbílakaupenda en hann hefur verið lækkaður og er þetta síðasta árið sem endurgreiðslur verða í boði nema lögum verði breytt. Þá stendur endurgreiðslan aðeins 20 þúsund kaupendum til boða og gert er ráð fyrir að hámarksfjöldanum verði náð um mitt ár.
Getur einhver útskýrt fyrir mér hvers vegna sú ráðstöfun umhverfisráðherra um styrk til handa bílaleigum til að kaupa rafmagnsbíla er góð ráðstöfun?
— Greipur Gíslason (@GreipurGisla) March 20, 2023
Það er ekki einu sinni 1. apríl.
— Oskar Audunsson (@oskarhaf) March 19, 2023
Hvernig er hægt að komast að þeirri niðurstöðu að af öllum atvinnugreinum landsins, þá þurfi bílaleigur milljarð í ríkisstuðning???
Minnkum tíðni Strætó í Kraganum og fellum niður Næturstrætó þar, tökum aftur upp samgöngusáttmálann til þess eins að minnka umfang Borgarlínunnar og minnka kosnað, styrkjum bílaleigur um milljarða á sama tíma. Þetta er ekki það sem Höfuðborgarsvæðið þarf á að halda.
— Ragnar Már Jónsson (@RagnarMrJnsson1) March 21, 2023
Hérna, af hverju þarf að styrkja bílaleigur í því að kaupa rafmagnsbíla? Það hafa aldrei verið fleiri ferðamenn hérna og einhverjar eru væntanlega tekjurnar.
— Samúel Karl Ólason (@Sameold_) March 21, 2023
Það er líka ekki eins og þessi fyrirtæki hafi ekki verið styrkt af ríkinu (okkur).https://t.co/wGeWJTh2Ak
Ríkisstjórn sem niðurgreiðir bílakaup fyrir bílaleigur en snertir ekki á losun frá votlendi, flugi eða kjötneyslu né gerir nokkuð til að draga úr bílaumferð er einfaldlega ekki að standa sig í umhverfismálum.
— Hjalti Már Björnsson (@hjaltimb) March 22, 2023
„Okkur finnst svolítið skrítið, að vera að veita svona miklu fé beint til einkafyrirtækja sem fengu heilmikið af styrkjum í sambandi við Covid,“ segir Auður Önnu Magnúsdóttir, framkvæmdastjóri Landverndar.
Þetta skjóti skökku við þar sem bæði komi fram í samgöngusáttmálanum og ríkisstjórnarsáttmála að efla eigi almenningssamgöngur, bæta við innviðum fyrir vistvæna samgöngumáta og hvetja til orkuskipta.
„Ríkisstjórnin hefur ekki lagt til neinar raunverulegar aðgerðir sem hamla innkaupum á bensín- og dísilbílum, sem væri þá til dæmis að hækka tolla verulega á þá eða hreinlega taka af skarið með það að innflutningur á bensín- og dísilbílum verði bannaður einhvern tíma fyrir 2030,“ segir Auður.
Þá sé þessi skortur á aðgerðum sé sérstaklega ógnvekjandi í ljósi svartrar skýrslu Sameinuðu þjóðanna sem kom út á mánudag. Þar segir að mannkynið þurfi að draga úr losun á gróðurhúsalofttegundum um meira en helming fyrir árið 2035 ef standast á markmið um að takmarka hlýnun á öldinni við eina og hálfa gráðu. Ríkisstjórnin þurfi að grípa til drastískra aðgerða.
„Þá erum við að tala um að fjölga ekki ferðamönnum, aðgerðir í landbúnaði, aðgerðir í öðrum stórum iðnaði. Það fer ekkert fyrir þeim, engum raunverulegum aðgerðum til að draga úr losun annað en að auka rafmagnsframleiðslu,“ segir Auður.
