Hannes Þór ætlar sér stóra hluti með Atlavík

Fyrirtækið ber nafnið Atlavík og eru meðeigendur hans þeir Allan Sigurðsson og Hannes Þór Arason, leikstjórar og framleiðendur. Þeir ætla að hasla sér völl á sviði sjónvarpsþáttagerðar og auglýsingaframleiðslu á Íslandi. 

„Nafnið Atlavík hefur ýmsar skýringar en aðallega finnst okkur gaman að tengja okkur við stað sem margir eiga nostalgískar minningar frá og vonum við að nýja fyrirtækið muni einnig færa fólki gleði með verkefnum sínum,“ segir Hannes Þór.

Þeir félagar hafa fengið Hafstein Gunnar Sigurðsson og Anní Ólafsdóttur leikstjóra til liðs við sig en bæði hafa verið lengi í bransanum og unnið að fjölmörgum verkefnum síðustu ár. Hafsteinn Gunnar gerði meðal annars þættina Aftureldingu ásamt bíómyndunum Undir Trénu og París Norðursins. Þá mun leikstjóra- og ljósmyndatvíeykið Helgi og Hörður einnig starfa með Atlavík.

„Teymið okkar er með mikla reynslu í sjónvarpsþátta- og kvikmyndagerð og hefur hlotið nokkur Edduverðlaun á undanförnum árum, ásamt að hafa gert auglýsingar sem hafa unnið til stórra alþjóðlegra verðlauna s.s. Cannes Lions og Effies. Markmið okkar er að halda áfram á þessari braut þar sem reynsla okkar liggur mest á þessu sviði, en langtímamarkmið Atlavíkur er klárlega að vinna að fleiri leiknum kvikmyndum og sjónvarpsseríum,“ segir Hannes Þór.

Þríeykið hefur á undanförnum árum komið að mörgum af vinsælastu sjónvarpsþáttum landsins. Má þar nefna Fílalag, Veisluna, Tónlistarmennina okkar og heimildarmyndina Velkominn Árni. Atlavík er nú þegar að vinna nokkur sjónvarpsverkefni fyrir allar sjónvarpsstöðvar landsins.

„Við erum núna í tökum á sjónvarpsseríu um IceGuys hljómsveitina sem verður frumsýnd hjá Símanum í október og svo erum við að hefja tökur á spennandi nýrri seríu fyrir Stöð 2. Einnig erum við að vinna að aðlögun sýningarinnar Óbærilegur léttleiki knattspyrnunnar, ásamt höfundum hennar Sveini Ólafi Gunnarssyni og Ólafi Ásgeirssyni. Verkefnið hlaut fyrsta handritastyrk frá Kvikmyndamiðstöð Íslands á dögunum. Þannig að það eru mörg járn í eldinum um þessar mundir og fyrirtækið strax komið á góða siglingu. Við erum því mjög spennt fyrir framtíðinni,” segir Hannes Þór að lokum.