Fimm stjörnur í Guardian

Hljómsveitin Amiina fær fimm stjörnur í breska dagblaðinu The Guardian fyrir tónleika sína í Glasgow á dögunum. Fyrsta plata sveitarinnar, Kurr, kemur út hérlendis í dag.

Greinarhöfundur The Guardian segir að tónleikarnir í Glasgow hafi verið mjög hljóðlátir og meira að segja hafi einn barþjónnin þurft að bera olíu á eina klósetthurðina vegna hávaðans sem hún framkallaði. „Amiina spila skrítna, fallega og viðkvæma tónlist sem fær hlustandann til að vera afar varkáran,“ segir í greininni.

„Í lok tónleikanna virtist andrúmsloftið þannig að áhorfendum líði eins og þeir hafi notið forréttinda með því að vera viðstaddir. Það er sjaldgæf og yndisleg tilhugsun og fólk verður bara að sjá Amiinu til að trúa þessu.“

Náðu góðum samningiFyrsta breiðskífa Amiina, Kurr, kemur út hérlendis í dag en þann 18. kemur hún út í Evrópu og degi síðar í Bandaríkjunum. Smekkleysa gefur plötuna út hér heima en þýska fyrirtækið Ever Records, sem er undir hatti elektróníska útgáfufyrirtækisins K7, gefur hana út erlendis.

„Við náðum rosagóðum samningi. Við fáum að halda rosalega miklu ákvarðanafrelsi og við getum gefið út mikið af tónlistinni okkar sjálfar. Þannig að við ráðum okkur mikið sjálfar,“ segir María Huld Markan úr Amiina. Bætir hún því við að góðu dómarnir í bresku fjölmiðlunum hafi verið mjög ánægjulegir. „Það er punkturinn yfir i-ið að fá svona góða dóma, því það getur verið erfitt að fá bresku pressuna með sér. Við erum allar rosalega ánægðar með það.“ Eins og ferðalagMaría segist vera afar ánægð með nýju plötuna. „Hún er reyndar löngu, löngu tilbúin en við erum rosalega ánægðar með hvernig til tókst. Það var smá kúnst að setja hana saman og láta hana hljóma þannig að þetta ætti vel saman á einni plötu. Hún er svolítið eins og ferðalag frá fyrsta laginu til þess síðasta.“ Hættar við hátíðirnarAmiina er hætt við að spila á tónlistarhátíðum í sumar. Ástæðurnar eru tvær að sögn Maríu Huldar. „Það er einfaldlega mjög erfitt að spila á „festivölum“ því við erum með þannig „set up“. Það er líka rosalega langt síðan við fengum hvíld, þannig að við sögðum bara pass við öllum festivölum í sumar.“ Sveitin ætlar þess í stað að fara í tónleikaferð til Evrópu og Bandaríkjanna í september og til Ástralíu, Nýja Sjálands og Japans í framhaldinu. Það eru því spennandi tímar framundan hjá þessari hæfileikaríku hljómsveit.

Útgáfutónleikar Amiinu vegna plötunnar hér heima verða haldnir í Iðnó þann 21. júní.

[email protected]