Brynjudalsá nálgast 100 laxa - stórlax í Víðidalsá

Alls voru 84 laxar komnir á land í Brynjudalsá í gær sem þýðir að um tveir laxar hafa veiðst á stöng á dag í ánni það sem af er sumri. Á veiðivefnum agn.is segir að bestu dagarnir í sumar hafi gefið allt að ellefu laxa og að nokkuð líflegt hafi verið í ánni frá fyrsta degi.

Á agn.is segir ennfremur að 50 laxar séu komnir á land í Hvannadalsá á Vestfjörðum og að á síðustu fimm dögum hafi þrettán löxum verið landað þar. Þá eru fyrstu laxarnir komnir á land í Miðdalsá í Steingrímsfirði. Einn þeirra mun hafa verið 12 punda hængur. Nokkuð af bleikju hefur einnig veiðst í Miðdalsá. Veiði í Eystri-Rangá gengur líka ágætlega en í gær höfðu 650 laxar veiðst þar.

Á vefnum lax-a.is var nú í hádeginu greint frá því að í Ytri-Rangá séu tæplega 900 laxar komnir á land. Veiðin síðustu daga hefur verið á bilinu 48 til 58 laxar á dag. "Þetta eru bestu veiðitölur hingað til á þessum tíma og má segja að flestir veiðimenn snúi mjög ánægðir frá Ytri rangá þessa dagana," segir á lax-a.is.

Á lax-a.is er einnig sagt frá því að í gærmorgun hafi veiðst stórlax í Víðidalsá. Ekki liggur fyrir hversu stór laxinn er en hægt er að sjá hann á myndinni sem fylgir þessari frétt. Laxinn tók Green Brahan, krók númer 14. Alls veiddust 10 laxar í Víðidalsá á morgunvaktinni í gær og samkvæmt vefnum lax-a.is er töluvert líf í ánni.

[email protected]