Vilja hlífa tveggja ára fiski en drepa urriðann

Forsvarsmenn Stangaveiðifélagsins Flúða biðla til veiðimanna í Fnjóská að hlífa tveggja ára fiski og smáhrygnum en drepa urriða. Þetta kemur fram á vef félagsins.

"Laxveiði í Fnjóská hefur ekki staðið undir væntingum nú í sumar en það sama má segja um flestar aðrar laxveiðiár sem við höfum frétt af," segir á vef Stangaveiðifélagsins. "Smálaxinn hefur ekki látið sjá sig í neinu magni og gerir það veiðina rólega - en það er alltaf kropp og nokkur skot inn á milli hér og þar."

Vegna þessarar löku veiði fer félagið fram á það við veiðimenn í Fnjóská að þeir setji tveggja ár fisk í klakkistur eða sleppi honum sé ekki mögulegt að koma honum í kistu. Einnig er farið fram á að smáhrygnum verði sleppt eða þær settar í klakkistur eins og tveggja ára fiskurinn.

"Við fórum yfir veiðibækurnar í dag og þá voru skráðir 196 laxar en vitað að eftir er að skrá einhverja frá síðustu 2 hollum sem voru að veiða. Af laxasvæðum eru komnir rúmlega 240 silungar í bók og rúmlega 100 af silungasvæðinu við Illugastaði," segir á vef félagsins.

"Stórurriði veiddist í Vatnsleysuhyl sunnudaginn 7. ágúst og vigtaði hann nákvæmlega 3,92 kg og var 72cm á lengd. Sá var stútfullur af laxaseiðum. Með urriðann, þá gilda önnur sjónarmið því við viljum ekki hleypa honum meira inn í vatnakerfið en þegar er. Hann er í örum vexti í ánni og hefur mikið veiðst af honum í sumar og því æskilegt að öllum urriða sem veiðist sé lógað áður en hann nær þeirri stærð að fara að hafa mikil áhrif á seiðabúskap lax og bleikju."

[email protected]