Fimm verstu handboltarokklögin

1. With Arms Wide Open

With Arms Wide Open með Creed er tvímælalaust handboltarokklag númer 1. Reyndar gæti allt með þessari sveit verið á þessum lista en það má að mörgu leyti segja að Creed séu hinir raunverulegu feður handboltarokksins. Fyrsti aðdáandi sveitarinnar á Íslandi, Hans Steinar Bjarnason, var starfsmaður á X-inu 977 á þessum tíma og kynnti þennann hrylling fyrir landanum. Það skal engan undra að Hansi er orðinn einn helsti íþróttafréttamaður þjóðarinnar í dag.

2. Hanging by a Moment

Þó svo að handboltarokkið sé ef til vill best skilgreint sem einhvers konar „ég tel mig vera miklu meiri maður en ég í raun og veru er" mikilmennsku-syndróm, þá á það sér líka væmnari hliðar. Þar kemur hljómsveitin Lifehouse gríðarlega sterk inn og ofursmellurinn Hanging by a Moment var klárlega óumdeilt flaggskip þeirra.

3. Kryptonite

Kryptonite var fyrsti „singull" Missisippi-sveitarinnar 3 Doors Down og má segja að með tilkomu hans hafi handboltinn á Íslandi fengið adrenalínsprautu í rassgatið. Textinn fjallar enda um sjálfan Superman og ekki laust við að margur handboltakappinn hafi fengið sér sérstaklega feita slummu í vörina daginn sem þetta lag kom út.

4. This Is How You Remind Me

Eins og sjálfsmorðssprengjuárásir tilheyra nánast undantekningarlaust trúarofstækismönnum þá á handboltahreyfingin þessa hljómsveit skuldlaust. This Is How You Remind Me með Nickelback kom út um það leyti sem Hansi Bjarna var að byrja í íþróttafréttunum. Lagið er líka eitt það viðbjóðslegasta úr þessari kategoríu, þó alltaf sé erfitt að gera upp á milli kúks og skíts.

5. Hero Of The Day

Þú getur fundið lélega tónlistarmenn sem gera góða tónlist hvar og hvenær sem er, en til þess að góðir tónlistarmenn geri virkilega lélega tónlist þá þarftu að kafa djúpt ofan í eitt sísta tímabil Metallica. Hero Of The Day er kannski ekki svo hræðilegt lag þegar litið er til baka en það bakaði sveitinni óæskilegan aðdáendahóp úr innsta hring handboltans. Aðdáendahópur sem sveitin hefur enn ekki náð að hrista af sér og margir vilja meina að muni hanga yfir sveitinni eins og grátt ský allt til endaloka.