Sannleikurinn: Fimmtungur íslensku þjóðarinnar er það feitur að hann er í raun og veru helmingur þjóðarinnar

Einn af hverjum fimm Íslendingum myndi éta fjölskyldumeðlim ef hann sullaði yfir sig bernaise sósu. Og hefur hlutfallið ríflega tvöfaldast á 20 árum. Stór hluti bæði karla og kvenna á Íslandi er óánægður með holdafar fólksins í kringum sig og vill að það grennist.

Algengt er að líkamsræktarstöðvar fyllist af fólki í janúar. Það mæta 7-8 feitir og plássið er búið. Margir vilja losa sig við aukakíló, bæta þol og heilsu eða geta sofið hjá án þess að eiga það á hættu að drepa einhvern.

Tæp 37,5% þjóðarinnar eru yfir kjörþyngd samkvæmt nýjustu tölum Landlæknisembættisins. Þar á bæ telja menn þó réttara að skoða hlutfall þeirra sem teljast með offitu til að átta sig á holdafarsvandanum en samkvæmt embættinu glímir rúm 20% þjóðarinnar nú við offitu. Feitt fólk er síðan líklegra til að fita börnin sín, með þeim afleiðingum að oft væri heilsusamlegra að einfaldlega kenna börnunum að reykja í staðinn.

Umræða um breytingar á holdafari landsmanna hefur verið áberandi í fjölmiðlum hér á landi og víðar síðustu ár. Ekki eins áberandi og offitusjúklingur með pulsu og ís en ansi áberandi. Nýir megrunarkúrar skjóta sífellt upp kollinum og markaði með ýmsar heilsu- og megrunarvörur virðast lítil takmörk sett. Enda eru kúnnarnir til staðar. Stórir kúnnar, meira að segja.

Mest af þessum heilsu og megrunarvörum er þó gagnlaust en dugar til að friða samvisku offitusjúklingsins á milli mála, en hann er oftast tilbúinn að reyna allt áður en hann byrjar að borða skynsamlega og labba aðeins.



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu sem er að tútna út.