Þegar Georges St-Pierre tók sér frí frá UFC þá varð flokkur Gunnars Nelson, veltivigtin, einn áhugaverðasti flokkurinn í UFC.
Það verða margir um hituna í þessum flokki og UFC fjallar um það í vikunni. Þá nefnir síðan átta öfluga kappa og segir að þar rétt fyrir utan sé Gunnar okkar Nelson.
"Síðan Georges hætti þá þarf kannski færri bardaga til þess að komast í titilbardaga. St-Pierre var meistari lengi og var frábær meistari," sagði Gunnar við UFC.com.
Áhugamenn um íþróttina bíða mjög spenntir eftir því að sjá Gunnar um helgina gegn Omari Akhmedov sem er gríðarlega öflugur og hugsanlega sá besti sem Gunnar hefur mætt til þessa.
Hann er búinn að vinna ellefu bardaga í röð en þetta er aftur á móti aðeins þriðji bardagi Gunnars í UFC.
"Hann er mjög kröftugur og lætur andstæðinginn finna fyrir því. Það er mikill kraftur í honum en hann hefur sína veikleika eins og allir," segir Gunnar og bætir við.
"Eins og ég hef sagt áður þá verð ég í hringnum, ég mun aðlagast aðstæðum, ég mun bregðast við og ég trúi því að ég muni vinna eins og alltaf."
