Útlit fyrir að Star Wars slái met um helgina

Gagnrýnendur halda vart vatni yfir sjöundu Stjörnustríðs-myndinni, The Force Awakens, sem var frumsýnd um allan heim í gær. Flestir eru sammála um að leikstjóranum J. J. Abrams hafi tekist afar vel að halda í það sem heillaði aðdáendur gömlu myndanna. Myndin hefur víðast fengið fjórar til fimm stjörnur.

Núna er jafnframt útlit fyrir að myndin muni standast væntingar framleiðenda en hún hefur þegar brotið aðsóknarmet í forsölu. Andvirði miða í forsölu nemur hundrað milljónum Bandaríkjadala, sem er met. Þetta þykir gefa til kynna að myndin muni slá met um opnunarhelgina og hala inn vel yfir tvö hundruð milljónum Bandaríkjadala og þar með slá met sem kvikmyndin Jurassic World setti fyrr á þessu ári.