Spáin fyrir Domino´s deild karla 2020-21: Grasið nú grænna hinum megin við lækinn (4.-6. sæti)

Íþróttadeild Vísis og Stöðvar 2 Sports spáir fyrir um gengi liðanna í Domino´s deild karla í körfubolta en keppni í deildinni hefst á fimmtudaginn. Við byrjuðum á því að skoða fallbaráttuna á mánudaginn og í gær fjölluðum við um baráttuna um tvö síðustu sætin inn í úrslitakeppnina. Að þessu sinnu skoðum við liðin sem við spáum að muni berjast um heimavallarrétt í úrslitakeppninni.

Liðin í fjórða til sjötta sæti í spánni okkar koma öll af Reykjavíkursvæðinu og tvö þeirra mættust í síðustu lokaúrslitum um Íslandsmeistaratitilinn fyrir einu og hálfu ári síðan. Litla liðið í þessum hópi undanfarin ár er núna líklegast til afreka mest eftir miklar breytingar hjá nágrönnum þeirra.

Það verður örugglega mikill rígur á milli Valsmanna og KR-inga í vetur. Valsmenn hafa verið litla liðið í Reykjavík í samanburði við velgengni KR og ævintýri ÍR-inga en nú gæti orðið breyting á því. Fullt af KR-ingum hafa fært sig yfir lækinn og eru komnir úr svart-hvítu í rautt. Innbyrðis leikir liðanna gætu líka ráðið miklu um það hvor endar ofar.

Ævintýralið ÍR hefur breyst mikið frá lokaúrslitunum 2019 og Borce Ilievski er að byggja upp nýtt lið í Breiðholtinu. ÍR-ingar eru aðeins á eftir hinum tveimur en það er ekki mikið. Það yrði vissulega afturhvarf til níunda áratugarins en þrjú Reykjavíkurfélög hafa ekki endað inn á topp sex síðan vorið 1987 eða í 33 ár.

ÍR í 6. sæti: Hvað getur Borce Ilievski töfrað fram í Breiðholtinu í vetur?

Borce Ilievski hefur sett saman mörg skemmtileg lið í Breiðholtinu á síðustu tímabilum og liðið í ár ætti að komast í úrslitakeppnina. Hvort að annað ævintýri sé í uppsiglingu er erfitt að segja.

ÍR-ingar lentu í miklum breytingum á síðasta tímabili en ætla nú að byggja ofan á það lið sem varð til í Seljaskólanum í fyrra. Það lið var löngu öruggt með sæti í úrslitakeppninni þegar tímabilinu var aflýst vegna kórónuveirunnar.

ÍR-liðið hefur boðið upp á margar sviðsmyndir á síðustu tímabilum þar á meðal að vera í baráttu um deildarmeistaratitilinn á einu ári og á öðru að komast alla leið í úrslitaeinvigið úr sjöunda sætinu þar sem liðið sló meðal annars út tvö efstu lið deildarkeppninnar.

Það er búið að hrósa Borce Ilievski mikið á undanförnum árum og ekki af ástæðulausu. Borce Ilievski hefur ávallt sett saman skeinuhætt lið í Seljaskólanum og gefið stuðningsmannasveitinni GhettoHooligans eitthvað til að syngja um.

Liðið sem fór lengst var byggt í kringum leikstjórnandann Matthías Orra Sigurðarson og miðherjann Sigurð Gunnar Þorsteinsson en þú eru nú báðir á bak og burt. Síðan hefur Borce Ilievski verið að leita að nýju liði og eyddi síðasta tímabili að í móta framtíðarlið.

Lykilatriði fyrir ÍR er að halda þremur lykilmönnum í þeim Evan Singletary, Collin Pryor og Danero Thomas en um leið bæta við leikmanni sem við sjáum ekki oft meðal erlendra leikmanna en það er hinn 210 sentímetra hái kóratíski miðherji Nenad Delic.

ÍR-liðið er samt ekki ungt lið þegar kemur að erlendum leikmönnum. Nenad Delic er orðinn 36 ára og Danero Thomas er 34 ára. Hinn þrítugi Collin Pryor er unglambið.

Stóra atriðið var að fá aftur leikstjórnanda liðsins í fyrra. Bandaríski bakvörðurinn Evan Singletary kemur aftur en hann spilaði mjög vel í deildinni í fyrra og var annar stigahæstur og fimmti stoðsendingahæsti leikmaður deildarinnar.

Georgi Boyanov var annar erlendur leikmaður sem fór mikinn í ÍR-búningnum en hann kemur ekki aftur. Það sást vel á gengi ÍR-liðsins hvort Búlgarinn spilaði vel eða illa. Boyanov var með 30,9 í framlagi í sigurleikjunum en aðeins 18,2 í tapleikjunum. Boyanov var með 20,6 stig og 10,2 fráköst í leik.

ÍR-ingar fylla í skarð hans með kóratíska miðherjanum Nenad Delic og þá ætlar Everage Richardson að reyna fyrir sér í Domino´s deildinni í vetur. Everage Richardson hefur farið á kostum í 1. deildinni undanfarin tímabil og var sem dæmi með 26,5 stig og 3,1 þrist í leik í fyrra. Áhyggjuefnið er auðvitað að hann er orðinn 34 ára gamall og kannski ekki alveg sami maður og skoað 38,9 stig í leik í 1. deildinni tímabilið 2017-18.

Það er mikið um eldri leikmenn í ÍR-liðinu en sá ungi sem gæti slegið í gegnum í vetur er hinn tvítugi Sigvaldi Eggertsson. Sigvaldi Eggertsson er að koma heim frá Spáni en hefur verið í stóru hlutverki hjá íslenskum unglingalandsliðunum síðustu ár. Sigvaldi hefur hæfileikana og hlusti hann á Borce Ilievski þjálfara er honum allir vegir færir í deildinni í vetur.

Eins og sjá má á þessari upptalningu þá er nóg af hæfileikaríkum leikmönnum í ÍR-liðinu og nóg af leikmönnum fyrir Borce Ilievski að setja saman í áhugavert lið. Það verður hins vegar stórt verkefni hjá Borce Ilievski að fá menn til að spila saman enda eru margir leikmenn í liðinu sem vilja einoka svolítið boltann. Það á líka eftir að koma í ljós hvort gömlu karlarnir séu kannski orðnir of gamlir til að koma ÍR upp í toppbaráttuna en á þeirra besta degi gætu þeir það vissulega.

Verður að eiga gott tímabil: Collin Pryor

Collin Pryor verður í stóru hlutverki í ÍR-liðinu og það verður svolítið undir honum komið að líma hópinn svolítið saman í vörn sem sókn. Hann þarf því halda leik liðsins svolítið gangandi og gera það sem nýtist liðinu best.

Collin Pryor er að byrja sitt annað tímabil í Seljaskólanum og vill byggja ofan á það síðasta þegar hann var með 16,7 stig og 5,4 fráköst að meðaltali í leik. Collin er frábær rullupsilari en ekki eins góður þegar hann vill komast í stjörnuhlutverkið.

Collin endaði tvo síðustu leiki síðasta tímabil á því að skora yfir tuttugu stig en alls skorað hann yfir tuttugu stig í sjö leikjum deildinni á síðustu leiktíð.

ÍR-liðið þarf áfram á orku og góðum varnarleik að halda frá Collin Pryor sem og að boltinn flæði vel í gegnum hann. Hann hefur mikla reynslu og þekkir íslensku deildina orðið mjög vel.

Benedikt Guðmundsson, sérfræðingur í Domino´s Körfuboltakvöldi, um lið ÍR í vetur:

KR í 5. sæti: Stór nöfn og breiddin farin en hvað með meistarapressuna?

Það þurfti mögulega heimsfaraldur til að stöðva ótrúlega sigurgöngu KR-inga því nú lítur út fyrir að Íslandsbikarinn sé að fara eitthvað annað en í Frostaskjólið. Lætin í Vesturbænum í sumar eru ekki besta veganestið inn í tímabilið og því er margar spurningar uppi um hvernig KR-liðið verður í vetur.

Hafi eitthvað lið í Domino´s deildinni átt erfitt sumar þá er það lið KR sumarið 2020. KR-ingar hafa verið mikið í fréttum og þær fréttir hafa flestar verið neikvæðar. Liðið byrjaði á því að kasta út þjálfara sínum í miðju COVID-19 og hefur í framhaldinu misst leikmenn til nágranna sinna í Val.

Fjárhagsvandræði körfuknattleiksdeildarinnar hafa verið líka í fjölmiðlum og veðmálið á að redda peningamálunum í úrslitakeppninni kom all svakalega í bakið á KR þegar úrslitakeppnin var flautuð af. Það er ljóst að starfsumhverfi þjálfara KR í dag er allt annað en það var fyrir ári síðan.

KR er eina liðið sem hefur orðið Íslandsmeistari undanfarin sex ár og þegar menn í Vesturbænum lögðu upp í tímabilið fyrir ári síðan þá átti að vinna þann sjöunda í röð. Kórónuveiran endaði sigurgöngu KR og það er ekki líklegt að KR-liðið geti tekið upp þráðinn á þessu tímabili.

Darri Freyr Atlason hefur gert Valskonur að Íslandsmeisturum en fær nú eins krefjandi verkefni og þau gerast í karlaboltanum. Þessi ungi þjálfari er kominn í draumastarfið 26 ára gamall en þetta gæti fljótt breyst í martraðarvetur byrji hlutirnir að ganga illa í byrjun.

Darri mætir örugglega kokhraustur til leiks eins og hans er von og vísa og hann sýndi líka þroska og yfirvegun á úrslitastundu með Valskonum. Hann er samt að taka risaskref og þarf að stýra skútunni út úr þeim ólgusjó sem hefur umkringt KR-liðið í sumar.

Það var mikið áfall fyrir KR að missa bæði Jón Arnór Stefánsson og Kristófer Acox og hvað þá yfir lækinn og í Val. Það eru samt nóg af hreinræktuðum KR-ingum eftir í liðinu.

Brynjar Þór Björnsson, Helgi Már Magnússon og Jakob Þór Sigurðarson verða allir áfram og þrátt fyrir að þeir séu ekki að vera yngri þá eru þeir menn sem vita hvernig hjólin snúast í Frostaskjólinu.

Matthías Orri Sigurðarson fær líka tækifærið til að taka sóknarleik liðsins svolítið upp á sínar herðar eins og hann gerði hjá ÍR. Hafi einhvern tímann verið þörf fyrir gott tímabil hjá Brynjari Þór Björnssyni þá er það núna.

KR-ingar munu þrátt fyrir fjárhagsvandræðin sín spila útlendingaleikinn eins og hin liðin í deildinni. KR er komið með þrjá erlenda leikmenn. Króatann Ante Gospic, Bandaríkjamanninn Ty Sabin og Lettann Roberts Stumbris.

Roberts Stumbris er 199 sm framherji, Ty Sabin er 188 sm bakvörður og Ante Gospic er 203 sem kraftframherji. Ty Sabin var stigahæsti leikmaður sænsku deildarinnar í fyrra og Ante Gospic hefur skilað flottum tölum í bestu liðum efstu deildar Króatíu.

KR-liðið má ekki við miklum meiðslum eða öðrum skakkaföllum því breiddin er ekki sú sama og undanfarin ár. Það er ekki gott þegar margir eldri leikmenn liðsins eru í stórum hlutverki í liðinu.

KR hefur stundum boðið upp á skrautlega frammistöðu í leikjum undanfarin ár þegar þeir hafa mætt vængbrotnir til leiks og þeir leikir eru víti til varnaðar hvað gæti gerst í vetur.

Á móti kemur að það eru enn eftir miklir sigurvegarar í liðinu og með góðum erlendum leikmönnum þá er aldrei hægt að afskrifa lið eins og KR. Darri Freyr Atlason getur alltaf náð stóra prófinu með glans og hjálpað sínu félagi í gegnum erfiða tíma með dyggri hjálp frá sínum reynsluboltum.

Komist KR-liðið klakklaust í gegnum tímabilið og nái jafnvel sínu valinkunna skriði inn í úrslitakeppnina þá má aldrei afskrifa sigurvegarana í hópnum. Raunhæf spá er hins vegar að KR verði um miðja deild og ekki líklegt til að blanda sér í toppbaráttuna.

Verður að eiga gott tímabil: Matthías Orri Sigurðarson

Matthías Orri Sigurðarson varð að stórstjörnu í Breiðholtinu þegar hann fór fyrir ÍR-ævintýrinu. Hann átti aðeins erfitt uppdráttar í KR-liðinu í fyrra enda ekki lengur aðalmaður síns liðs heldur hluti af fjölmennri bakvarðarsveit sem gerði tilkall til mínútna og skota.

Matthías Orri skipti í annan gír eftir áramót og var á góðu róli hjá liðinu þegar tímabilið var flautað af í vor. Matthías Orri var með 14,5 stig og 4,8 stoðsendingar að meðaltali í síðustu fjórum leikjum KR sem unnust allir og það mátti sjá hann vera búinn að koma sér betur fyrir í sínu hlutverki.

Nú ætti Matthías að geta skipt aftur yfir í ÍR-gírinn enda hefur leikmannahópurinn þynnst.

Ólíkt mörgum öðrum leikmönnum KR-liðsins þá ætti Matthías að eiga sín bestu ár eftir. Hann er enn bara 26 ára gamall og þetta er tímabilið þar sem hann ætti að geta orðið aðalmaðurinn í þessu KR-liði.

Benedikt Guðmundsson, sérfræðingur í Domino´s Körfuboltakvöldi, um lið KR í vetur:

Valur í 4. sæti: Sóttu sér mikinn liðstyrk yfir lækinn

Valsmenn hafa ekki unnið Íslandsmeistaratitilinn í 37 ár (1983) og þeir hafa ekki komist í úrslitakeppnina síðan vorið 1992. Nú er menn allt í einu farnir að velta fyrir sér þessum hlutum því Valsmenn stefna ekki lengur á það að komast í úrslitakeppnina eins og undanfarin ár heldur á það að gera eitthvað í úrslitakeppninni.

Það er ljóst að þetta Valslið verður með mikinn KR-stimpil á sér enda þreytast menn ekki á því að grínast með að Valsmenn séu að setja saman KR-b lið.  Pavel Ermolinskij er nú kominn með nóg að gömlum liðfélögum sínum á Hlíðarenda og gamla þjálfara sinn Finn Frey Stefánsson líka.

Finnur sem allt vinnur er að snúa aftur heim í íslensku deildina eftir eitt ár í hvíld og annað ár með lið Horsens IC í Danmörku. Finnur gerði KR að Íslandsmeisturum fimm ár í röð frá 2014 til 2018 og er eini þjálfarinn í sögu úrvalsdeildarinnar sem hefur náð því. Þetta verður fyrsta tímabil Finns á Íslandi síðan að hann vann þann fimmta í röð vorið 2018.

Finnur hefur sótt feita bita í gamla meistaraliðið sitt en fallbaráttulið breytist ekki í Íslandsmeistaralið á einum degi. Það mun því reyna á Finn að móta toppbaráttulið hjá Val. Hann var fljótur að hreinsa til og Valsmenn losuðu sig strax við þá Ragnar Nathanaelsson og Austin Magnús Bracey. Öllum erlendu leikmönnum liðsins var líka skipt út.

Jón Arnór Stefánsson ákvað að taka svanasönginn sinn í sama félagi og eldri bróðir sinn gerði garðinn frægan. Það voru margir hissa að sjá Jón Arnór taka þetta skref eftir öll þessi ár í KR. Það segir mikið um aðdráttarafl Hlíðarendaliðsins í dag. Koma Kristófers Acox er síðan enn eitt dæmið um að Valsmenn ætla að gera alvöru hluti á þessu tímabili.

Það er alveg hægt að sjá fyrir sér að Valsmenn endi langa bið eftir titlum en kannski ekki alveg strax. Jón Arnóri liggur kannski á að vinna titla með Val ef hann ætlar að setja skóna upp á hillu næsta vor en það þarf margt að smella til að Valsmenn fari alla leið í vetur.

Finnur Atli Magnússon kom á miðju tímabili í fyrra og verður áfram. Sömu sögu er að segja af Frank Aron Booker en faðir hans var einmitt í Valsliðinu þegar liðið komst síðast í lokaúrslitin um Íslandsmeistaratitilinn. Baráttuhundurinn og orkuboltinn Illugi Steingrímsson gæti lent í meiri vandræðum með að fá mínútur en hinir tveir.

Valsmenn þurfa aftur á móti að hafa engar áhyggjur af því að falla úr deildinni eða komast ekki í úrslitakeppnina. Allt annað en öruggt sæti í úrslitakeppninni væru mikil vonbrigði á Hlíðarenda miðað við það sem hefur sótt í háklassa leikmönnum í sumar.

Fyrrnefnd félagsskipti skipta vissulega miklu máli en kannski eru þau mikilvægastu að sækja Sinisa Bilic til Tindastóls. Sinisa Bilic er fjölhæfur og frábær leikmaður sem var stigahæsti leikmaður Stólanna í fyrra með 19,6 stig í leik. Bilic bíður upp á marga möguleika fyrir hugsandi þjálfara og getur skapað vandræði fyrir mótherjanna á mörgum stöðum. Valsmenn geta líka stillt upp mjög hávöxnu liði með hann sem þrist og Pavel sem leikstjórnanda.

Það verður gaman að sjá hversu mikið hinn ungi og stórefnilegi Ástþór Atli Svalason fái að spila í vetur en hann var kominn í stórt hlutverk þegar hann meiddist í fyrra.

Stóra spurningin núna er síðan hversu margir erlendir leikmen bætast við og hvaða stöðu bandaríski leikmaður Valsliðsins muni spila. Eins og er þá er breiddin í Valsliðinu ekki mikil.

Það er full ástæða til bjartsýni fyrir veturinn hjá Val en væntingarnar mega þó ekki verða of miklar. Liðið hefur allt til alls til að vera í efri hluta deildarinnar og við spáum því að Valsmenn taki síðasta sætið sem gefur heimavallarrétt í úrslitakeppninni.

Valsmenn hafa ekki spilað í úrslitakeppninni í 28 ár og það væri kannski við hæfi að fyrsti leikur liðsins í úrslitakeppninni í tæpa þrjá áratugi yrði spilaður að Hlíðarenda.

Verður að eiga gott tímabil: Pavel Ermolinskij

Það eru liðin sjö ár síðan að lið varð Íslandsmeistari án þess að vera með Pavel Ermolinskij í sínu liði. Pavel Ermolinskij sjálfur hefur unnið allar úrslitakeppnir á Íslandi sem hann hefur tekið þátt í frá og með árinu 2011. Það er engin tilviljun.

Pavel Ermolinskij kom til Vals í fyrrasumar og virðist hafa opnað með því flóðgáttir því KR-ingar hafa streymt yfir á Hlíðarenda síðan. Valsliðið í fyrra var ekki alveg ekki þeim klassa sem Pavel er vanur en í vetur er staðan allt önnur.

Þeir sem þekkja til Pavels Ermolinskij vita vel að þar fer leikmaður sem vill stýra leik síns liðs og hungrar í að komast í stærstu leikina. Á sama tíma er það mikilvægt að halda honum ánægðum og heilum því það standast fáir Pavel snúninginn þegar hann er á fullri ferð.

Pavel er nú kominn með vin Jón Arnór Stefánssson aftur með sér í liði og þá er góð samvinna hans með Kristófer Acox í vegg og veltu fyrir löngu orðin kunn. Pavel hefur því allt til alls til að sýna enn á ný mikilvægi sitt og mátt sinn í að leiða lið til góðs árangurs í Domino´s deildinni.

Benedikt Guðmundsson, sérfræðingur í Domino´s Körfuboltakvöldi, um lið Vals í vetur: