Taka skal fram að þetta er eingöngu skoðun blaðamanns og er aðallega gert til skemmtunar.
Lof
Steven Lennon
Skotanum líður einkar vel upp á Skipaskaga en hann skoraði öll þrjú mörkin er FH vann þægilegan 3-0 sigur á ÍA. Vissulega komu tvö mörkin af vítapunktinum en það þarf að skora úr þeim til að þau telji. Er þetta annað árið í röð sem Lennon skorar þrennu upp á Skaga og ljóst að hann kann vel við sig í rokinu.
Sindri Kristinn Ólafsson
Keflavík vann nokkuð óvæntan 2-0 sigur á lærisveinum Óskars Hrafns Þorvaldssonar í Breiðablik um liðna helgi. Gestirnir úr Kópavogi spiluðu nokkuð vel í leiknum og þá sérstaklega í fyrri hálfleik. Sindri Kristinn var hins vegar í banastuði í marki heimamanna og varði allt sem á markið kom, þar á meðal nokkur dauðafæri.
Oliver Haurits
Þegar menn opna markareikning sinn í Pepsi Max deildinni með marki yfir aftan miðju eiga þeir lof skilið. Oliver Haurits skoraði eitt af mörkum sumarsins er Stjarnan tapaði 2-3 fyrir Víking.
Hálfleiksræða Heimis
Íslandsmeistarar Vals voru heppnir að vera 1-0 yfir er flautað var til hálfleiks í Kórnum. HK höfðu verið mikið mun betri aðilinn en gestirnir komust yfir undir lok fyrri hálfleiks. Svo virðist sem Heimir Guðjónsson, þjálfari Vals, hafi látið nokkur vel valin orð falla í hálfleik en það var allt annað að sjá Val í síðari hálfleik. HK átti engin svör og Valur vann 3-0 sigur.
Sóknarleikur KR
KR lék sinn besta leik á tímabilinu og mögulega besta leik síðari ára er liðið pakkaði Fylki saman í Vesturbænum. Lokatölur 4-0 en sigurinn var síst of stór miðað við magnið af færum sem fóru forgörðum hjá heimamönnum í leiknum. Gestirnir úr Árbænum áttu engin svör við öflugum sóknarleik heimamanna og voru í raun heppnir hversu kærulausir KR-ingar voru oft á tíðum í aðgerðum sínum.
Last
Andleysi Fylkis
Fylkir hefur oftar en ekki mætt í Vesturbæinn og strítt KR-ingum undanfarin ár. Það er eins og leikmenn liðsins finni fyrir auknum vilja og krafti er þeir mæta á Meistaravelli. Það var svo aldeilis ekki staðan í leik liðanna í 14. umferð en gestirnir voru heppnir að vera aðeins 2-0 undir í hálfleik.
Það lifnaði aðeins yfir þeim sóknarlega í síðari hálfleik en varnarleikurinn var líkt og gatasigti. Gæti farið svo að Ragnar Sigurðsson komi inn í liðið fyrr en áætlað var ef næsti leikur verður svipaður.
Fljótfærir Blikar
Það vita allir og amma þeirra hvað leikplan Breiðabliks er þegar kemur að uppspili. Óskar Hrafn fór yfir það eftir leik að ekki sé hægt að hampa leikstíl liðsins og gagnrýna á sama tíma enda mun leikstíll sem einblínir jafn mikið á að spila boltanum í gegnum pressu fá á sig klaufaleg mörk við og við.
Blikar geta þó ekki verið sáttir við fyrra markið sem liðið fær á sig í Keflavík. Anton Ari Einarsson. markvörður, gefur á Viktor Örn Margeirsson áður en Viktor Örn er kominn í almennilega stöðu til þess að taka við knettinum.
Miðvörðurinn tekur við boltanum og þá er hrægammurinn Joey Gibbs mættur í andlitið á honum sem endar með því að Viktor Örn – réttfættur varnarmaður spilandi vinstra megin – neglir tuðrunni í Gibbs og í netið. Smá þolinmæði og Viktor hefði getað fengið boltann dýpra á vellinum – eða betur undirbúinn – og leyst úr pressunni.
Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.
