Gaf for­eldrum sínum hræði­lega jóla­gjöf sem var fljótt látin hverfa

Jólamolar Vísis munu birtast reglulega fram að jólum. Þar fáum við að kynnast þjóðþekktum einstaklingum í nýju ljósi og komast að því hvað það er sem kemur þeim í jólagírinn. Jólamolunum er ekki síður ætlað að koma lesendum Vísis í hið eina sanna hátíðarskap.

Hvort myndirðu skilgreina þig sem Elf eða The Grinch?

„Hahah, þar sem ég lék Elf í talsetningunni á íslensku þá vel ég hann allan daginn!“

Hver er þín uppáhalds jólaminning?

„Ætli það sé ekki þegar ég gaf Þóri bróður riffil í jólagjöf og varð svo algjörlega gáttaður þegar hann gaf mér LÍKA RIFFIL! Ég hef ekki upplifað aðra eins undrun og gleði. Við vorum 4ra og 5 ára og bjuggum á Blönduósi. Mig grunar raunar enn að mamma hafi haft eitthvað með þetta val á jólagjöfum að gera.“

Hver er eftirminnilegasta jólagjöf sem þú hefur fengið?

„Þær eru fjölmargar. Fyrir utan riffilinn góða er það sjálfsagt rafmagnshjólið sem Baldur minn gaf mér. Það var og er stórkostleg gjöf sem nýtist mér mjög vel.“

Hver er versta jólagjöf sem þú hefur fengið?

„Úff ég man ekki eftir að hafa fengið slæma jólagjöf en ég man eftir hræðilegri jólagjöf sem ég gaf foreldrum mínum sem eiga allt gott skilið. Hraunvasinn sem ég gaf þeim var ekki málið og hefur ekki sést síðan á jólunum 1979.“

Hver er uppáhalds jólahefðin þín?

„Jólatrjáainnsetningin sem fjölskylda mín stendur að á hverju ári en þar er haldin myndlistarsýning með þemað jólatré og gestir og gangandi þurfa að geta hvert okkar gerði hvaða tré. Trén voru fjögur fyrsta árið en eru nú orðin átta!“

Hvert er þitt uppáhalds jólalag?

„Fyrir utan Náttfatapartý með Gunna og Felix er það auðvitað Nú mega jólin koma fyrir mér með Sigurði Guðmundssyni.“

Hver er þín uppáhalds jólamynd?

„Eftir að sjá dragshow á Tælandi um jólin 2017 þar sem Sound of Music var í forgrunni verð ég að nefna þá mynd. Þetta var stórkostlegt dragshow.“

Hvað borðar þú á aðfangadag?

„Síðast var það humar í forrétt og appelsínuönd í aðalrétt. En nú er búið að veiða allan humarinn til að svala græðgi þjóðarinnar svo kannski breytum við forréttinum í ár.“

Hvers óskar þú þér í jólagjöf í ár?

„Mér finnst alltaf gott að fá náttföt.“

Hvað er það sem hringir inn jólin fyrir þér?

„Ríkisútvarpið og helst vil ég að Gerður G Bjarklind óski mér gleðilegra jóla. Þá kyssi ég manninn minn.“

Er eitthvað skemmtilegt á döfinni hjá þér núna fyrir jólin?

„Já svo sannarlega. Við Gunni Helga frumsýnum nýtt jólaleikrit í Gaflaraleikhúsinu og leikum á aðventunni og á milli jóla og nýárs. Verkið heitir Jól á náttfötunum og er ætlað allri fjölskyldunni frá tveggja ára og uppúr. Með okkur á sviði er Karl Olgeirsson og Björk Jakobsdóttir leikstýrir.

Svo ætla ég að syngja út um víðan völl, veislustýra jólahlaðborði á Hótel Laugabakka og njóta þess að vera með barnabörnunum mínum.“