Aðalheiður og Flóvent endurtaka leikinn

Forkeppnin var hörkuspennandi allt til enda og að henni lokinni voru það sigurvegarar fjórgangsins, þau Aðalheiður Anna Guðjónsdóttir á Flóvent frá Breiðstöðum, sem leiddu forkeppnina eftir glæsilega sýningu og hlutu einkunnina 7.93. 

Í öðru sæti inn í úrslit var Ásmundur Ernir Snorrason á Hlökk frá Strandarhöfði með 7.83 og í því þriðja var villiköttur Top Reiter liðsins, Védís Huld Sigurðardóttir á Hrafnfaxa frá Skeggsstöðum, með einkunnina 7.70. Jöfn á eftir þeim voru Árni Björn Pálsson á Kötlu frá Hemlu II og Flosi Ólafsson á Fork frá Breiðabólsstað með 7.60. 

Rétt á eftir þeim var uppboðssknapi kvöldsins Hanne Smidesang á Tóni frá Hjarðartúni með 7.57 en þau mættu einbeitt til leiks og uppskáru sæti í A úrslitum.

A úrslitin voru gríðarlega jöfn og spennandi. Þetta var ótrúleg veisla á að horfa og frábær stemning í stúkunni. Fyrir slaka tauminn voru jöfn þau Aðalheiður Anna á Flóvent frá Breiðstöðum og Ásmundur Ernir á Hlökk frá Strandarhöfði. Fór það svo að Aðalheiður og Flóvent sigruðu nokkuð örugglega með 8.08. Það var svo uppboðsknapi kvöldsins, Hanne Smidesang á Tóni frá Hjarðartúni, sem landaði 2. sætinu eftir frábær innkomu. Í 3. sæti voru sigurvegararnir frá því í fyrra, þeir Flosi Ólafsson og Forkur frá Breiðabólsstað og nokkrum aukastöfum á eftir þeim var villiköttur Top Reiter liðsins, Védís Huld á Hrafnfaxa frá Skeggsstöðum.

Þrátt fyrir frábæra byrjun voru það Ásmundur Ernir og Hlökk frá Strandarhöfði sem höfnuðu í 5. sæti með 7.42 en þau lentu í smá hnökrum í slaka taumnum. Það voru svo þau Árni Björn og Katla frá Hemlu II sem höfnuðu í 6. sæti með einkunnina 7.04.

Lið Top Reiter hlaut liðaplatt­ann en liðið var með tvo knapa í A-úr­slit­um, þau Árna Björn Pálsson og Védísi Huld Sigurðardóttur. Teitur Árnason keppti einnig fyrir þeirra hönd og hafnaði í 8. sæti á Nirði frá Feti. Lið Top Reiter er núna í 4. sæti í liðakeppninni með 82.5 stig. Efst í liðakeppn­inni er hins vegar lið Ganghesta/Margretarhofs með 102,5 stig. Í 2. sæti er lið Auðsholtshjáleigu/Horseexport með 94 stig og í því 3. er Hestvit/Árbakki með 89.

Efst í ein­stak­lingskeppn­inni eftir kvöldið er Aðalheiður Anna Guðjónsdóttir með fullt hús stiga eða 24 stig eftir að hafa sigrað báðar keppnirnar sem af eru. Nýliðinn Signý Sól Snorradóttir er næst með 10 stig. Aðalheiður er því komin með gott forskot inn í veturinn. Þó er nóg af stigum eftir í pottinum, en 6 keppnisgreinar eru eftir.

Næsta mót verður 3. mars þegar keppt verður í fimmgangi. Þetta er óneitanlega eitt af skemmtilegustu kvöldum deildarinnar þar sem glæsilegustu alhliðagæðingar landsins mæta til leiks. Í fyrra voru það Árni Björn Pálsson og Katla frá Hemlu II sem sigruðu. Það verður spennandi að sjá hvort þau mæti aftur til leiks og verji titilinn. Við megum búast við því að núverandi Íslandsmeistarar þau Sara Sigurbjörnsdóttir og Flóki frá Oddhóli mæti og veiti þeim samkeppni en það mun ekki koma í ljós fyrr rásröð verður birt á miðvikudegi fyrir mót. En svo er alltaf gaman að sjá unga og efnilega hesta koma fram í sviðsljósið og vonandi munu þeir ekkert gefa þeim reyndari eftir.

Það gleður okkur að tilkynna að nú ætlar Toyota á Selfossi að bjóða áhorfendum frítt inn í HorseDay höllina á Ingólfshvoli. Veitingarnar verða á sínum stað, veglegri en áður, og því tilvalið að mæta tímanlega og gæða sér á veitingum bæði fyrir keppni og á meðan henni stendur. Þau ykkar sem ekki komast geta tryggt sér áskrift og horft á Alendis