Valur er Íslandsmeistari kvenna í handbolta árið 2023. Þetta varð ljóst eftir að liðið sópaði ÍBV út úr úrslitaeinvígi Olís deildarinnar í Vestmannaeyjum í dag.
Valur kom inn í leikinn í dag með 2-0 forystu eftir að hafa unnið fyrstu tvo leikina frekar örugglega og því var ÍBV liðið með bakið upp við vegg.
Valskonur gerðu sitt og unnu að lokum 23-25 sigur og Íslandsmeistaratitillinn í höfn.
Anton Brink, ljósmyndari Vísis, var í Vestmannaeyjum í dag og tók myndir af því þegar að Valskonur lyftu Íslandsmeistaratitlinum.
Thea Imani Sturludóttir, leikmaður Íslandsmeistara Vals var að vonum ánægð eftir að Valskonur tryggðu sér titilinn með því að sópa ÍBV út úr úrslitaeinvígi Olís deildarinnar í Vestmannaeyjum í dag.
Sigurður Bragason, þjálfari kvennaliðs ÍBV í handbolta var að vonum svekktur með að sitt lið hafi lotið í lægra haldi gegn Val í úrslitum Olís deildar kvenna í dag. Hann er þó einnig stoltur af sínum stelpum og býst við því að stýra liði ÍBV á næsta tímabili.
