„Bannað að vera illa klædd eða skóuð í kulda og slabbi“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Tískan er listgrein, sköpunarform sem breytist með tíð og tíma en líka árstíðum og búsetu. Ég nýt þess að taka þátt í því að elska hana og virða. 

Hún endurspeglar líka persónuleika og það er hægt að tjá sig á margvíslegan hátt með tískunni.

Hver er uppáhalds flíkin þín og af hverju?

Ætli ég verði ekki að segja Frankie Shop blazerarnir mínir sem ég á í nokkrum litum. Alltaf mitt go to.

Eyðirðu miklum tíma í að velja föt hverju sinni?

Ég get ekki sagt það og ég held að vinkonur mínar geti staðfest að ég er mikil spondant kona þar eins og í mörgu öðru. 

Ég vel föt eftir því í hvaða skapi ég er í hverju sinni. Ég get til dæmis aldrei ákveðið dress kvöldið áður því svo vakna ég kannski í allt öðru skapi og vil alls ekki klæðast fyrirfram ákveðnu lúkki.

Á tískuvikum mæti ég oftast með yfirvigt út á flugvöll því ég verð að vera með nóg til taks þar til að púsla saman. Skipulagið er því ekki mikið en ég held ég hafi núorðið góða tilfinningu fyrir að raða saman dressi á stuttum tíma. Þetta getur verið bæði kostur og galli.

Hvernig myndirðu lýsa stílnum þínum?

Basic er best. En alltaf með smá twisti.

Hefur stíllinn þinn breyst mikið í gegnum tíðina og hvernig þá?

Já ég held að það sé óhætt að segja það. Sem unglingur var ég leitandi, prófaði alls konar og var stundum eins og jólatré þegar ég skoða gamlar myndir (sem betur fer fyrir tíma samfélagsmiðla). 

En ég vil meina að sá tími sé líka mikilvægur því það hjálpaði mér við að finna mína hillu sem mér líður vel á í dag. 

Í seinni tíð kaupi ég minna af flíkum en vel þá frekar vandaðar vörur. Ég reyni líka eftir fremsta megni að velja og klæðast íslenskri hönnun. 

Við eigum svo mikið af frábærum fatahönnuðum og þegar ég bjó erlendis þá fylltist ég alltaf stolti þegar ég sagði frá því að flíkurnar mínar væru eftir íslenska snillinga.

Ég vinn líka með regluna að ef ég kaupi nýja flík þá sel ég aðra úr skápnum. Hringrás er nýjasta tíska, mæli með því að herma.

Nýturðu þess að klæða þig upp?

Já, ég hef gaman af því að klæða mig en það þarf ekkert alltaf að vera síðkjóll svo að mér þyki það skemmtilegt. Mér líður líka vel í náttfötum og inniskóm þegar það er óveður úti. 

Oftar en ekki skipti ég svo út inniskóm fyrir hæla, skelli í mig áberandi eyrnalokkum og rauðum varalit og er þá good to go, út á náttfötunum.

Hvaðan sækirðu innblástur í tískunni?

París og þá aðallega frá gömlum sætum frönskum körlum með hatt.

Götutískan er líka í símanum og þar er heimurinn minni en við höfum upplifað áður - frábært fyrir íslenskar fasjónistur. Tískuheimurinn stækkar og víkkar með tilkomu samfélagsmiðla, nú erum við öll með lítið tæki á okkur sem inniheldur fullt af innblæstri á skjánum, frá öllum heimshornum.

Ertu með einhver boð og bönn þegar það kemur að klæðaburði?

Allt má. En þér verður að líða vel í því sem þú klæðist. Það er til fullt af fallegum flíkum sem ég elska á öðrum en myndi aldrei klæðast sjálf því það er ekki ég.

Ef ég ætti að setja eitt bann þá væri það að klæða sig ekki eftir veðri á Íslandi. Það er alveg bannað að vera illa klædd eða skóuð í kulda og slabbi.

Hver er eftirminnilegasta flík sem þú hefur klæðst og af hverju?

Ætli ég verði ekki að segja brúðarkjóllinn minn, af því að það var besti dagurinn og það er enn fallegasta flík sem ég á í fataskápnum mínum. 

Ég kom einnig sjálf að hönnun kjólsins í samvinnu við mína bestu Andreu Magnúsdóttir fatahönnuð, það gerir hann enn verðmætari.

Býrðu yfir einhverju góðu ráði þegar það kemur að tísku?

Yfirhafnir eru oftast flíkur sem ég mæli með því að fjárfesta í. Það er einhvern veginn hægt að dressa klassískar yfirhafnir upp og niður eftir tilefni, þannig að ef þú ert tilbúin að eyða meiri pening í einhverja eina flík þá mæli ég alltaf með yfirhöfn. 

Skór eða aukahlutir eins og sólgleraugu eða taska eru líka eitthvað sem ég eyði frekar í en til dæmis buxur eða bol.

Hér er hægt að fylgjast með Elísabetu Gunnars á samfélagsmiðlinum Instagram.