„Ég hlakka til að klæða mig upp á hverjum morgni“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Það sem mér finnst hvað skemmtilegast er stíliseringin; að para saman liti, snið og efni og búa til eitthvað epískt. Tjáningin, fjölbreytileikinn og fegurðin er svo skemmtileg. 

Það að trefill geti verið trefill, en hann getur líka verið bolur, pils, húfa, slæða eða belti. 

Tískan getur verið allt sem þú vilt að hún sé. Það sem hefur alltaf heillað mig við tískuna er sagan bak við hverja flík, ástríðan, tíminn og sköpunin. Ég bara elska tísku og allt sem henni fylgir. Ég er alltaf glöð þegar ég er í flottum fötum.

Hver er uppáhalds flíkin þín og af hverju?

Úff, þetta er eins og að gera upp á milli barnanna sinna. Upp á síðkastið hef ég mikið klæðst rauðu leðurhönskunum mínum. Þeir eru í miklu uppáhaldi. 

Svo geng ég alltaf með tvo hringa á mér sem pabbar mínir gáfu mér og eru mér mjög kærir. Ég held að þeir verði fyrir valinu.

Eyðirðu miklum tíma í að velja föt hverju sinni?

Ég eyði vandræðalegum miklum tíma í að velja föt. 

Meira að segja þegar ég er bara heima að fara að horfa á mynd, þá máta ég hitt og þetta áður en ég sest niður í sófann. Mér einfaldlega líður ekki vel ef ég er ekki sátt með outfittið.

Hvernig myndirðu lýsa stílnum þínum?

Þegar stórt er spurt. Alls konar. Hann er bara Anna María. Ég veit ekki hvernig ég gæti betur lýst honum. Ég klæðist því sem mig langar að hverju sinni. Ég get verið bæði maximalísk og mínimalísk, í kjólum eða jakkafötum, í skyrtu eða fótboltatreyju. 

Klassískt Önnu Maríu outfit væri samt líklegast góð skyrta, frekar baggy gallabuxur og jakki - þá blazer, pels eða leðurjakki. Ég er oftar en ekki í hælum eða kúrekaskóm. Svo fer ég ekki út úr húsi án sólgleraugna.

Hefur stíllinn þinn breyst mikið í gegnum tíðina og hvernig þá?

Gífurlega. 

Ég hef alltaf haft skoðanir á því hverju ég klæðist. Litla Anna lét ekki sjá sig í hverju sem er.

Stíllinn minn hefur þróast með mér í gegnum árin og mun koma til með að gera það um ókomna tíð. Fyrir nokkrum árum var ég meira í því að fylgja tískubólum, keypti þá ódýrari föt sem ég notaði kannski í mánuð.

Í dag finnst mér ég leita mun meira í klassískan og vandaðri fatnað, sem ég get notað enn eftir tuttugu ár. Ég er miklu frekar til í að splæsa í eina dýra flík af góðum gæðum sem ég veit að ég mun nota næstu áratugi. 

Eitt sem hefur fylgt mér stöðugt í gegnum árin eru hælaskór. Ég hef alltaf elskað hælaskó.

Nýturðu þess að klæða þig upp?

Það er það skemmtilegasta sem ég geri. 

Ég hlakka til að klæða mig upp á hverjum morgni. Enda skipti ég um föt nokkrum sinnum á dag og tek minn tíma hverju sinni.

Hvaðan sækirðu innblástur í tískunni?

Ég sæki mér innblástur frá alls konar fólki sem ég sé á götunni, kvikmyndum, jafnvel tónlist. Upp á síðkastið hef ég sótt mikinn innblástur frá gömlum ítölskum körlum og gömlum konum hérna í Kaupmannahöfn.

Annars eru vinkonur mínar allar tískudrottningar og ég lít mikið til þeirra þegar ég þarf innblástur. Mamma mín er samt mesti töffari sem ég þekki og verður alltaf mitt helsta „style icon“.

Ertu með einhver boð og bönn þegar það kemur að klæðaburði?

Það er BANNAÐ að klæða sig í föt sem manni líður ekki vel í. Lykilatriði er að líða vel í því sem maður klæðist, það skín af manni ef maður er óþægilegur eða óöruggur. 

Töffarinn kemur að innan. Svo gera sólgleraugu öll outfit betri.

Hver er eftirminnilegasta flík sem þú hefur klæðst og af hverju?

Vintage Roberto Cavalli kjóll af mömmu sem ég klæddist í tvítugsafmælinu mínu. Án alls efa.

Býrðu yfir einhverju góðu ráði þegar það kemur að tísku?

Mamma hefur barið það í mig frá blautu barnsbeini að vera alltaf vel til fara; alltaf betra að vera overdressed en underdressed sagði hún. Sem útskýrir mörg ár af prinsessukjólum og hælaskóm. 

Annað sem ég hef lært er að stærðir geta oft á tíðum verið villandi. Það er mikilvægt að festast ekki í þeirri hugsunarvillu að maður eigi sér eina ákveðna, heilaga stærð. 

Snið og efni eru öll svo mismunandi. Mikilvægast er að átta sig á því hvað passar best að hverju sinni.

Hér er hægt að fylgjast með Önnu Maríu á samfélagsmiðlinum Instagram.