Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.
Hvað finnst þér skemmtilegast við tískuna?
Hvað hún er fjölbreytt og breytileg. Mér finnst stíll eiga að vera eitthvað sem einkennir karakterinn og einnig dagsformið hverju sinni. Svo mér þykir mjög gaman að fylgjast með hvernig hver og einn túlkar tísku á sinn hátt.
Svo auðvitað gamla klisjan sem er svo sönn, hvað hún snýst í marga hringi!
Hver er uppáhalds flíkin þín og af hverju?
Þetta er spurning sem að ég hef iðulega átt í vandræðum með að svara þegar ég hef fengið hana í gegnum tíðina. Það er engin ein sem kemur fljótt upp í hugann en fallegar yfirhafnir og skór hafa átt hug minn allan í langan tíma.
Það eru hlutir sem að setja alltaf punktinn yfir i-ið að mínu mati. Aukahlutir gleymast oft í þessum umræðum en sólgleraugu og skart er til dæmis eitthvað sem ég elska að pæla í og þykir gaman að poppa látlausari dress upp með.
Annars myndi ég líklega segja að ullarkápan mín frá Gestuz, úr Andrá Reykjavík, sé sú flík sem ég nota hvað mest yfir vetrartímann. Hún er þykk og hlý og hentar því vel yfir köldustu dagana á sama tíma og mér finnst hún guðdómlega falleg.
Eyðirðu miklum tíma í að velja föt hverju sinni?
Nei, ég get ekki sagt það. Ég var mun duglegri við það hér áður fyrr þegar ég hafði meiri tíma. Að koma sjálfum sér og tveimur börnum út klukkan átta á morgnanna býður ekki upp á miklar pælingar.
Í dag gríp ég oftast flíkur í flýti og skelli mér í, svo ég get að einhverju leyti sagt að ég klæði mig eftir því hvernig ég fer fram úr á morgnanna.
Hvernig myndirðu lýsa stílnum þínum?
Ég myndi segja að hann væri töffaralegur en á sama tíma kvenlegur.
Ég er löngu hætt að klæðast einhverju sem mér þykir óþægilegt en þægindi eru í miklu fyrirrúmi hjá mér.
Það er eflaust hægt að flokka stílinn minn sem skandinavískan stíl, en skandinavísk tíska höfðar lang mest til mín og einnig er ég mikil „basic er best“ týpa.
Ég er ekki endilega sú sem að fylgi fast í alla tískustrauma heldur tel ég mig nokkuð samkvæma sjálfri mér í tísku svona yfirleitt. Þó að auðvitað séu mörg tískutrend sem að hitta beint í mark.
Svo er ég aldrei í öllu svörtu!
Hefur stíllinn þinn breyst mikið í gegnum tíðina og hvernig þá?
Já ekki spurning. Þegar ég var yngri snerist líf mitt um íþróttir en ég æfði lengi handbolta og fótbolta með Stjörnunni. Á þeim tíma voru Stjörnugallarnir hvað mest notaðir.
Þegar ég byrjaði í menntaskóla man ég hvað ég fór raunverulega að hafa mikinn áhuga á tísku og hef haft allar götur síðan.
Svo þroskast maður (vonandi) eftir því sem maður eldist og því fylgja sterkari og betur mótaðar skoðanir. Í dag versla ég mér mun færri flíkur en ég gerði hér áður fyrr. Ég versla mér vandaðri flíkur, meiri gæði og finnst mikilvægt að flíkin sé tímalaus og hafi gott notagildi.
Nýturðu þess að klæða þig upp?
Já, alveg klárlega. Þó að tíminn sé ekki alltaf með mér í liði þá finnst mér alltaf gaman að klæða mig og þegar ákveðin tilefni eru framundan eyði ég auðvitað meiri tíma í að spá og spegúlera, máta og prófa hin og þessi lúkk.
Hvaðan sækirðu innblástur í tískunni?
Héðan og þaðan! Fólkinu í kringum mig og úti á götu. Ég er heppin að vera umkringd miklum fagurkerum og mér finnst gaman að sjá hvernig fólk klæðir sig.
Samfélagsmiðlar bjóða auðvitað upp á mikið aðgengi í þessum málum og auðvelt á fá góðan innblástur frá flottu fólki þar. Aðallega sæki ég minn innblástur frá nágrannalöndum okkar.
Ertu með einhver boð og bönn þegar það kemur að klæðaburði?
Örugglega fullt af þeim – en ekkert sem kemur fljótt upp í hugann. Ég er algjörlega þar að fólk eigi að klæða sig eftir því sem þeim líður best. Líkt og ég nefndi hérna fyrir ofan þá er ég aldrei í öllu svörtu.
Það hefur þróast þannig mjög ómeðvitað og er ekki eitthvað sem ég hef markvisst passað upp á heldur finnst mér bara eitthvað rangt þegar ég horfi á mig í spegli í öllu svörtu.
Hver er eftirminnilegasta flík sem þú hefur klæðst og af hverju?
Ætli það séu ekki allir síðkjólarnir sem ég klæddist í kringum Ungfrú Ísland tímann minn fyrir mörgum árum.
Það er ákveðin upplifun að klæðast slíku og sannarlega ekki eitthvað sem maður gerir á hverjum degi.
Býrðu yfir einhverju góðu ráði þegar það kemur að tísku?
Að spá í notagildi þegar þú verslar er frábært tips, að versla færri flíkur en velja vandaðar flíkur sem að standast tímans tönn.
Svo það að vera samkvæmur sjálfum sér, ekki vera markvisst að reyna að fylgja einhverjum straumum. Þegar manni líður vel í eigin skinni skín það í gegn.
Að brosa og vera með gott sjálfstraust er lang besta dressið sem þú getur klæðst!
