Upp­gjörið: Fram - ÍBV 43-36 | Fín fyrir­heit fyrir Fram

Fram vann 43-36 gegn ÍBV í stórskemmtilegum leik, sem var jafn og spennandi framan af en leystist upp á lokamínútunum. Liðin sitja í þriðja og sjötta sæti deildarinnar og munu mætast í úrslitakeppninni ef ekkert breytist í lokaumferðinni sem verður spiluð í næstu viku. 

Leikurinn var frá fyrstu mínútu algjör sóknarsýning og á sama tíma kennsla í slökum varnarleik. Stórkostleg skemmtun fyrir áhorfendur og algjör martröð fyrir menn sem vinna við að halda utan um tölfræði.

Bæði lið fengu á sig fullt af vítum og brottvísunum, sem bauð upp á enn meiri markaskorun. Liðin skiptust nokkrum sinnum á forystunni en leikurinn var í járnum þar til um tíu mínútur voru eftir.

Eyjamenn áttu þá slæman kafla þar sem Andri Erlingsson tapaði boltanum tvisvar í röð og Arnór Máni Daðason, markmaður Fram, tók síðan tvö dauðafæri. Á þeim tíma var líka besti sóknarmaður ÍBV, Kristófer Ísak, sprunginn og sestur á bekkinn. 

Fram nýtti sér tækifærið til að taka afgerandi forystu og ÍBV átti ekki endurkvæmt. Lokamínúturnar leystist leikurinn upp í algjöra vitleysu og enga markvörslu, þar til lokatölur urðu 43-36.

Atvik leiksins

Kristófer Ísak Bárðarson var búinn að vera langbesti sóknarmaður ÍBV og negla inn nokkrum stórkostlegum skotum, þegar hann fékk tveggja mínútna brottvísun með um fimmtán mínútur eftir.

Við það kólnaði hann mikið, og allt Eyjaliðið í leiðinni, sem gaf Fram færi á að vinna leikinn. Hefði vélin haldist heit væri ÍBV mögulega tveimur stigum ríkari.

Stjörnur og skúrkar

Títtnefndur Kristófer Ísak með stórkostlega frammistöðu. Besti maður vallarins þar til hann þurfti að setjast.

Marel Baldvinsson valinn maður leiksins hjá Fram og vel að því kominn. Skemmtilegur spilari með baneitraða undirhönd. Reynir Þór Stefánsson markahæstur hjá Fram og með alveg frábæran leik.

Skúrkarnir eru markmenn ÍBV, sem fengu vissulega litla hjálp frá vörninni, en vörðu lítið í leiknum og akkúrat ekkert á lokamínútunum.

Viðtöl

Marel: Vörnin léleg en við stefnum á að vinna allt

„Mjög ánægður, ekki kannski með vörnina. Hún var frekar léleg hjá okkur en sóknin frábær eins og vanalega“ sagði maður leiksins, Marel Baldvinsson, fljótlega eftir leik.

„Við áttum erfitt með Kristófer, hann hoppaði upp fyrir utan og skoraði tíu mörk. Við þurfum að laga það og mæta betur út á menn“ bætti hann einnig við.

Marel skoraði sjö mörk fyrir Fram í kvöld. Flest þeirra með glæsilegum undirhandarskotum.

„Þeir voru að lesa yfirhandarfintuna frekar vel, þannig að já, það varð aðalvopnið.“

Miklar líkur eru á því að Fram og ÍBV muni mætast fljótlega aftur, í fyrstu umferð úrslitakeppninnar.

„Það leggst bara vel í okkur. Okkur finnst við vera bara bestir og stefnum bara á að vinna allt, þannig það skiptir okkur eiginlega engu máli hverja við fáum“ sagði Marel að lokum.

Magnús: Þurfum að kveikja á tengingunni milli varnar og markvarða

„Við þurfum að halda áfram að vinna í okkur vörn og markvörslu. Við sjáum að sú tenging er ekki alveg eins og við viljum hafa hana. Sést kannski best á fjölda marka skoruðum í sitt hvorum hálfleiknum og undanförnum leikjum. Það er eitthvað sem við þurfum að bæta. Við erum að skora enn einn leikinn í röð yfir þrjátíu mörk, þannig að við getum ekki kvartað mikið yfir sóknarleiknum“ sagði Magnús Stefánsson, þjálfari ÍBV, á röltinu upp í rútu eftir leik.

„Við erum með [Kristófer] heitan en þetta er stór maður og það fer mikil orka í þetta hjá honum. Þegar maður ætlar að eiga þessa gaura inni þegar mest á reynir þarf maður að vera klókur og spara orkuna aðeins, annars er hættan á að sprengja hann bara“ sagði Magnús, spurður hvers vegna Kristófer Ísak kom ekki strax aftur inn á eftir að brottvísunin var búin.

Miklar líkur eru á því að Fram og ÍBV muni mætast fljótlega aftur, í fyrstu umferð úrslitakeppninnar. Hvernig myndi það einvígi leggjast í þig?

„Bara mjög vel. Fram liðið spilar bara fínan bolta og allt það, en þeir henta okkur ágætlega. Við þurfum bara aðeins að kveikja á tengingunni milli varnar og markvarða. Þá er ekki mikið sem vantar upp á“ sagði Magnús að lokum.