Trump segist stefna aftur á framboð

Þetta hefur miðillinn Politico eftir heimildarmönnum sínum meðal Trump-liða. Trump sjálfur hefur sömuleiðis gefið það í skyn opinberlega í vikunni. Þykir það til marks um að Trump muni ekki sleppa taki sínu á Repúblikanaflokknum á næstu árum.

Undanfarin misseri hefur hann unnið hörðum höndum að því að bola þeim þingmönnum sem greiddu atkvæði með því að ákæra hann fyrir embættisbrot, þegar það var gert í annað sinn, úr flokknum.

Má þar nefna Liz Cheney, LIsu Murkowski og Mitt Romney.

Áhrifamenn innan Repúblikanaflokksins hafa þó blendnar tilfinningar varðandi annað forsetaframboð Trumps. Blaðamenn Politico ræddi við tuttugu þingmenn flokksins í báðum deildum þings.

Einn þeirra, öldungadeildarþingmaðurinn John Cornyn, sagði Trump hafa skemmt arfleifð sína með hegðun sinni eftir forsetakosningarnar í nóvember. Trump hefur varið miklu púðri í að grafa undan þeim kosningum og hefur lengi og ítrekað haldið því ranglega fram að umfangsmikið svindl hafi kostað hann sigur.

Vildu ekki gagnrýna Trump undir nafni

Nokkrir þeirra lýstu því að aðrir frambjóðendur gætu fangað þá stemningu sem kom Trump í Hvíta húsið, án þess að bera þá bagga sem forsetinn fyrrverandi ber. Eins og til dæmis tvær ákærur fyrir embættisbrot og árásina á þinghúsið í janúar, þegar stuðningsmenn hans reyndu að koma í veg fyrir formlega staðfestingu úrslita forsetakosninganna.

Þá gæti Trump einnig verið í vandræðum í dómstólum.

Sjá einnig: Kalla saman á­kæru­dóm­stól vegna rann­sóknar á Trump

Saksóknarar í New York settu nýverið saman ákærudómstól sem mun mögulega meta hvort tilefni sé til að ákæra Trump og aðra stjórnendur fyrirtækis hans eftir umfangsmikla rannsókn sem hefur staðið yfir í rúm tvö ár.

Í frétt Politico er ítrekað að flestir þingmennirnir sem lýstu yfir efasemdum um annað framboð Trumps þvertóku fyrir að gera það undir nafni.

Beita málþófi í öldungadeildinni

Öldungadeildarþingmenn Repúblikanaflokksins ætla sér að beita gamalli reglu um aukinn meirihluta, sem kallast filibuster á ensku, á þinginu til að koma í veg fyrir að þingið stofni nefnd til að rannsaka árásina á þinghúsið í janúar. Demókartar styðja stofnun slíkrar nefndar en það gera Repúblikanar ekki.

Þar sem þingið skiptist 50/50 milli þingflokka og sextíu atkvæði þarf til að koma slíku frumvarpið í gegn, reglunnar um aukinn meirihluta, er ekki útlit fyrir að stofnun nefndarinnar verði.

Demókratar eru alls ekki sáttir við afstöðu Repúblikana.

„Æstur múgur reynir að taka þinghúsið yfir og við getum ekki fengið Repúblikana með okkur í lið til að skrásetja þann viðburð? Það er sorglegt,“ hefur AP fréttaveitan eftir Demókratanum Dick Durbin.

„Það segir okkur hvað er að öldungadeildinni og reglunni um aukinn meirihluta.“

Trump hefur lýst því yfir að hann sé alfarið mótfallinn því að nefnd sem þessi verði stofnuð. Miðað við kannanir er meirihluti bandarísku þjóðarinnar þó á því að réttast væri að stofna nefndina, samkvæmt frétt AP fréttaveitunnar.

Mitch McConnell, leiðtogi Repúblikana í öldungadeildinni sagði þingflokk sínum í vikunni að standa gegn frumvarpinu, því samþykkt þess og stofnun nefndarinnar myndi koma niður á flokknum í þingkosningum næsta árs, sem Repúblikanar eru í góðri stöðu fyrir.

35 þingmenn Repúblikanaflokksins greiddu atkvæði með frumvarpinu í fulltrúadeild þingsins.

Sjá einnig: Tugir repúblikana studdu rannsókn á árásinni

Það vakti athygli á þinginu í vikunni þegar Demókratarnir Joe Manchin og Kyrsten Sinema sendu frá sér yfirlýsingu þar sem þau hvöttu samstarfsmenn sína til að greiða atkvæði með frumvarpinu um rannsóknarnefndina.

Það væri mikilvægt að stofna slíka nefnd og að hún nyti stuðnings beggja flokka.

Manching er frá Vestur-Virginíu og Sinema frá Arizona en bæði ríkin eru talin tiltölulega íhaldssöm. Þau tvö hafa hingað til staðið í vegi þess að Demókratar geti fellt niður regluna um aukinn meirihluta og kallað eftir frekari viðræðum við Repúblikana.

Þessi nýja yfirlýsing þeirra þykir þó til marks um að þeim þætti ekki rétt að beita reglunni til að stöðva frumvarp sem nýtur jafn mikils stuðnings og þetta.

Þegar Demókratar fóru fyrst að ræða það að fella niður regluna um aukinn meirihluta, brugðust Repúblikanar reiðir við.

Manchin sendi frá sér tilkynningu í dag þar sem hann gagnrýndi Repúblikana harðlega fyrir að ætla að greiða atkvæði gegn frumvarpinu. Beindi hann orðum sínum einnig að McConnell og sagði hann hafa tekið pólitíska afstöðu með því að tengja rannsóknarnefnd við næstu kosningar.

„Þeir trúa ekki á að sannleikurinn muni frelsa þig, svo þeir halda áfram að lifa í ótta,“ sagði Manchin.