Eigum að hætta að hlaupa eins og hamstur í hjóli

„Hvíld þarf ekki að taka mikinn tíma, þess vegna skiptir virk hvíld máli. Það er ekki góð hvíld að stara á símann upp í sófa á kvöldin. Hvíldin getur tekið stuttan tíma en verið virkilega skilvirk,“ segir Sylvía Briem Friðjónsdóttir, sem á og rekur Normið ráðgjafastofu, ásamt Evu Mattadóttur. 

„Með því að nýta sér alls kyns tól til að hvíla taugakerfið, nærðu forskoti. Þú einfaldlega hefur úthald til þess að hlaupa lengra og ert hamingjusamari í leiðinni,“ segir Eva.

Í dag eins og í gær, ræðir Atvinnulífið við fyrirlesara sem verða á ráðstefnu Ungra athafnakvenna, UAK, sem haldin verður í Hörpu næstkomandi laugardag. 

Þar munu Sylvía og Eva standa fyrir vinnustofu undir yfirskriftinni „Hvíldu þig á toppinn“ en markmið ráðstefnunnar er að velta því upp, hvernig forystu framtíðin þarf á að halda í atvinnulífinu.

Mikil pressa er úrelt viðhorf

Sylvía og Eva vilja meina að í samfélaginu sé einhvers konar mýta sem segir okkur að hlaupa eins og hamstur í hjóli til þess að fá viðurkenningu á vinnumarkaði.

Það sé hins vegar alls ekki rétt viðhorf og hafi aðeins leitt til kulnunar og streitu.

Pressan um að standa sig eykst alltaf meira og meira og það er hægara sagt en gert að rífa sig út úr þessum kröfum og „slaka á" ef markmiðið er að komast sem lengst á vinnumarkaði,“ 

segir Sylvía og bætir við: „Það þarf veruleg viðhorfsbreyting að eiga sér stað ef fólk ætlar að endast í kapphlaupinu og halda góðri heilsu.“

Sylvía er með BA í sálfræði, þrennskonar alþjóðleg þjálfararéttindi Dale Carnegie & Associates og níu ára reynslu af þjálfun á ungu fólki, fullorðnum og stjórnendum fyrirtækja. Sylvía er líka með heilsu- og markþjálfa réttindi frá New York, er Orku heilari, bandvefslosunar kennari og með diplómu í NLP (Neuro Linguistic Programming) og Master Practitioner réttindi frá Ráðgjafaskóla Íslands.

Eva er með þrenns konar alþjóðleg þjálfararéttindi frá Dale Carnegie & Associates og hefur þjálfað fjölda fólks síðastliðin sjö ár, allt frá gunnskólabörnum yfir í stjórnendur fyrirtækja. Eva útskrifaðist sem markþjálfi árið 2014, er REIKI heilari, bandvefslosunarkennari og með NLP Master Practitioner réttindi.

Eva tekur undir með Sylvíu en segir að þótt umræðan hafi opnast síðustu árin um kulnun og hversu hættulegt það getur verið að keyra sig á kaf í kulnun, þurfi meira til.

„Því þetta rótgróna hugarfar halda áfram að laumast aftan að fólki. Margir gleyma sér skiljanlega í kapphlaupinu og setja eigin heilsu í 10. sæti, það er að segja ef heilsan er svo heppin að fá sæti í forgangsröðuninni.“

Ekki hægt að keyra á tómum tanki

Á vinnustofunni á laugardag ætla Sylvía og Eva að gefa ráðstefnugestum alls kyns tæki og tól sem hjálpar fólki að finna betur jafnvægið.

Enda eru þær sannfærar um að það séu meiri líkur á að fólk komist á toppinn með góðri hvíld en stanslaust á hlaupum!

Með hvíldinni og góðu jafnvægi, segja Sylvía og Eva að fólk nái þeirri þrautseigju og krafti sem til þarf, til að ná markmiðum sínum. Til dæmis í starfsframa.

„Fólk heldur að það geti keyrt hringinn með tóman tank, geymir eða gleymir að borða, hunsar merki frá líkamanum og svo framvegis,“ segir Sylvía en bendir á að þetta sé þó eitthvað sem aldrei gengur til lengdar.

„Þetta er einmitt skekkjan sem þarf að leiðrétta,“ segir Eva og bætir við: 

Fólk sem að „leyfir sér“ sjálfsrækt, hvíld og almennilega hleðslu er að uppskera eiginleika og hæfni sem margir fara á mis við vegna streitu og langþreytu.“

Að sögn Evu og Sylvíu hafa þær sjálfar tekið sérstaklega eftir því þegar þær hafa þjálfað fólk síðustu árin, að fólk sem er í góðu jafnvægi og setur sjálfan sig í forgang, nær eftirtektarverðum árangri.

Og þennan árangur má sjá endurspeglast í svo mörgu.

Til dæmis betri skerpu á verknum, betri einbeiting og staðfesta í ákvarðanatöku, skýrari ferlar til þess að framkvæma stór verkefni og betri geta til að skapa eitthvað nýtt.

Fengu hugmyndina í Covid

Að opna umræðu um þjálfun sem hvetur fólk meira til þess að hvíla sig til þess að ná árangri, er hugmynd sem í raun kviknaði í Covid.

„Við tókum eftir fréttum í Covid þegar fólk var að vinna heima, þá töluðu einhver fyrirtæki um það að þau væru að ná meiri árangri,“ segir Sylvía.

Og við trúum því að með því að hlúa betur að andlegri heilsu starfsmanna og gefa starfsmönnum meira rými til þess að forgangsraða heilsunni náum við töluvert meiri árangri.“

Þá vitna þær í rannsókn sem Harvard stóð fyrir en niðurstöður hennar sýna að starfsfólk sem fær svigrúm til að gera stundum ekkert og hvíla sig, áorkar meira og sýnir meiri skilvirkni.

„Þegar stjórnendur þessa fyrirtækis sáu niðurstöður þessara rannsókna tóku þeir ákvörðun að þessi stefna leiddi til betri heildar niðurstöðu fyrir fyrirtækið,“ segir Eva og bætir við: 

Þessi stefna er ekki einungis góð fyrir hvern og einn einstakling í fyrirtæki heldur hafði áhrif á skilvirkni og afkastagetu fyrirtækisins sem leiddi til betri niðurstöðu í framtíðinni. 

Við finnum það sjálfar hvað þetta getur haft mikil áhrif.“

Sylvía og Eva hvetja vinnustaði til þess að skoða betur ávinningin sem felst í því að starfsfólk hvíli sig meira.

„Ef stjórnendur heillast af tilhugsuninni um starfsfólk með skýra einbeitingu í verkefnavinnu og meiri afkastagetu ættu þeir klárlega að fara skoða útfærsluatriði, þetta er framtíðin,“ segir Sylvía.

Dagskrá ráðstefnu UAK má sjá hér.