Elira flutt á yndis­legan stað á Kirkju­sandi

„Við höfum bætt við okkur þremur snyrtiherbergjum og hlökkum til að taka á móti okkar gömlu viðskiptavinum og nýjum í hágæða húðmeðferðir og aðrar flottar meðferðir á komandi mánuðum,“ segir Rakel Ósk Guðbjartsdóttir, eigandi Elira Beauty.

Elira Beauty var áður starfrækt í Smáralind en opnaði núna í lok febrúar á nýjum stað. „Við vorum voðalega ánægðar í Smáralindinni en okkur langaði að auka þjónustuna og bæta við meðferðarherbergjum og okkur vantaði því meira pláss.“

Öðruvísi vöruúrval

Verslunin sérhæfir sig í hágæða húð- og förðunarvörum og býður upp á vörumerki sem hafa ekki sést áður á íslenskum markaði.

„Við veljum vörur inn af kostgæfni. Í dag er endalaust úrval af allskonar vörum og það er erfitt að átta sig á hvað á að velja. Við höfum valið sérstaklega inn vörumerki sem eru á hæsta mælikvarða hvað varðar virkni.

 Vörurnar sem þú kaupir hjá okkur í Eliru hafa verið sérvaldar af fagaðilum og eru góðar fyrir þig og góðar fyrir umhverfið,“ segir Rakel og bætir við, „vörumerkin eru meðvituð um að vera með sem bestu innihaldsefnin til að hámarka árangur ásamt því að vörurnar innihaldi ekki óæskileg aukaefni sem geta verið skaðleg fyrir þig eða umhverfið.“

Þýskir læknar á toppnum

„Augustinus Bader og Dr. Barbara Sturm eru okkar þekktustu vörumerki enda eru þetta vörur sem eru gjörsamlega að tröllríða öllu út í heimi. Vörurnar eru með mikla virkni og skila góðum árangri fyrir notandann.“

Augustinus Bader vörurnar komu á markað árið 2018 og hafa allar götur síðan verið einar af vinsælustu vörunum hjá stjörnunum en Kim Kardashian, Gigi Hadid, Jennifer Aniston og Victoria Beckham hætta ekki að dásama vörurnar. Merkið hefur unnið yfir 50 verðlaun fyrir vörur sínar og nýjasta rósin í hnappagatið bættist við þegar The Rich Cream, einstaklega áhrifaríkt rakakrem sem eykur frumuendurnýjun, var valið besta krem allra tíma af 300 sérfræðingum í faginu.

Dr. Barbara Sturm er þekkt fyrir að vera húðlæknir stjarna á borð við Hailey og Justin Bieber, Emma Roberts og Irina Shayk og frumkvöðull í plasma andlitsböðum (já, þessum sem Kim Kardashian fór í með sitt eigið blóð). Í dag er hún aftur á móti þekktust fyrir vörulínu sína sem heitir í höfuðið á henni. Mildar, bólgueyðandi húðvörur með frábæra virkni, vörur sem hafa hreinsast úr hillunum í Selfridges og Net-A-Porter.

Meðferðir fyrir rauða dregilinn

„Við höfum verið að bjóða upp á húðvörur frá Augustinus Bader og Dr. Barbara Sturm núna í að verða þrjú ár og þessi vörumerki eru með húðmeðferðir sem stórstjörnur í Hollywood keppast við að komast í fyrir rauða dregilinn. 

Fyrir verðlaunaafhendingarnar sér maður á samfélagsmiðlum stjörnur á borð við Emily Blunt, Victoria Beckham, Julia Garner og Meghann Fahy lofsama húðmeðferðirnar sem þær fara í til að ná fram heilbrigði og ljóma húðarinnar“ segir Rakel.

„Við erum því ótrúlega spenntar að segja frá því að á næstu mánuðum getum við byrjað að kynna þessar meðferðir fyrir Íslendingum, en með því að bæta við okkur meðferðarherbergjunum getum við loksins veitt viðskiptavinum okkar þessar frábæru upplifanir meðfram notkun á vörunum.“

Fagleg ráðgjöf og góð þjónusta mikilvæg

Snyrtivöruverslunin leggur áfram áherslu á ráðgjöf og góða þjónustu. 

„Úrvalið af húð- og snyrtivörum er mikið í dag og aðgengi að allskonar upplýsingum er ótæmandi. Því er mikilvægt að geta fengið faglega ráðgjöf um innihald og rétta notkun húð- og förðunarvara. Hér í Eliru vinna eingöngu lærðir snyrtifræðingar og förðunarfræðingar og við bjóðum einungis upp á hágæða snyrtivörur og förðunarvörur ásamt persónulegri þjónustu,“ bætir Rakel við að lokum.

Nánar á elira.is.