Baldur Þórhallsson, prófessor í stjórnmálafræði við Háskóla Íslands, og Felix Bergsson, eiginmaður hans, munu í hádeginu í dag, funda með þeim hópi fólks sem hvatt hefur Baldur til að gefa kost á sér til embættis forseta Íslands.
Fundurinn fer fram í Bæjarbíói í Hafnarfirði og hefst klukkan 12.
Fólk sem hefur hvatt Baldur til að bjóða sig fram til forseta hafa haldið úti Facebook-hópnum Baldur og Felix – alla leið, og telja meðlimir hópsins nú um 18 þúsund.
Hægt verður að fylgjast með fundinum í beinu streymi í spilaranum að neðan.
Forsetakosningar eru handan við hornið, þar sem þjóðin velur sér fyrsta nýja forsetann frá árinu 2016. Hér í vaktinni verður fylgst með öllum helstu vendingum í kapphlaupinu um Bessastaði næstu þrjá mánuði.
