Vonbetri eftir daginn í dag

Þetta sagði Þorgerður Katrín Gunnarsdóttir, formaður Viðreisnar, við fréttastofu eftir stjórnarmyndunarviðræður dagsins. Hún segir vinnu dagsins hafa gegnið ljómandi vel. Þar séu sex starfshópar að vinna að ýmsum málum, og henni skilst að vinnan mjakist ágætlega í vel flestum þessara hópa.

„Það veit á gott að ég heyrði það að samtöl þessara flokka eru fín. Þetta eru náttúrulega þrír ólíkir flokkar, en um leið er mjög margt sem þeir geta sameinast um,“ segir Þorgerður í samtali við fréttastofu.

Hvernig er tilfinningin eftir daginn í dag?

„Hún er ágæt. Eftir daginn í dag myndi ég segja að við höfum þokast nær. Við sjáum bara hvað setur. Það voru góð samtöl tekin í dag, ekki síst á milli okkar formannanna þar sem við erum að ná lendingu í mörgum stórum málum, en nokkur brýn líka eftir sem við þurfum að finna úrlausn á,“ segir hún.

Þorgerður segir að það hljóti allir að sjá af fregnum um að heildarafkoma ríkissjóðs verði neikvæð um 1,2 prósent af vergri landsframleiðslu á næsta ári. Efnahagsmálinu séu stærsta málið við samningaborðið hjá þessari mögulegu ríkisstjórn

„Efnahagsmálin eru að mínu mati alpha og omega upphafs þessarar ríkisstjórnar. Við erum að vanda okkar þar. Þessar tölur frá fjármálaráðuneytinu um verri afkomu ríkissjóðs gera verkefnið að einhverju leyti snúnara, en við nálgumst það af mikilli festu ábyrgð og hæfilegri bjartsýni.“

Að sögn Þorgerðar eru einhver mál sem flokkarnir þrír þurfa enn að leysa sín á milli, en hún segir að samtal þeirra sé einlægt og heiðarleika.

Talað hefur verið um að þessi mögulega Valkyrjustjórn myndi fækka ráðuneytum. Þorgerður segir enga tölu komna á það hvernig þeim yrði fækkað. Þau samtöl séu í gangi. Í raun sé fjöldi ráðuneyta ekki stærsta málið.

Hvernig er hljóðið innan úr Viðreisn? Er fólk ánægt með þessar stjórnarmyndunarviðræður?

„Já ég myndi segja það í heildina þá er fólk ánægt. Það er eftirvænting og forvitni. Mér finnst meðbyrinn vera meiri með þessum samtölum en ég upphaflega bjóst við. En mér finnst gott að segja að við allar stelpurnar, leyfi ég mér að segja, erum mjög meðvitaðar um okkar ábyrgð. Við þurfum að vinna hratt en samt vanda okkur og gera þetta af festu þannig að samfélagið okkar fari á næstu árum inn í betri og vissari tíma.“