Vill refsa Kanada svo lesið verði um það í sögu­bókum

Upprunalega ætlaði Trump að setja 25 prósent tolla á þessar vörur en hefur frestað því tvisvar sinnum. Í dag lýsti hann því svo yfir á Truth Social, samfélagsmiðli sínum, að hann hefði skipað viðskiptaráðherra sínum að hækka tollana um 25 prósent til viðbótar og láta þá taka gildi á morgun.

Trump sagði gera þetta vegna þess að Kanada að forsætisráðherra Ontario-fylkis hefði sett 25 prósenta viðbótargjald á rafmagn sem íbúar þriggja ríkja Bandaríkjanna kaupa þaðan.

Í annarri færslu sakar Trump Kanadamenn um mikla lágkúru þar sem þeir noti rafmagn, sem hafi áhrif á líf saklauss fólks, til að þrýsta á Bandaríkin.

„Þeir munu gjalda svo mikið fyrir þetta að lesið verður um það í sögubókum til margra ára.“

Forsetinn sagði einnig að lækki Kanadamenn ekki þetta gjaldi verði einnig settir tollar á bíla og tengda íhluti frá Kanada þann 2. apríl. Trump segir að það muni svo gott sem gera út af við bílaiðnaðinn í Kanada, sem er mjög samofinn iðnaðinum í Bandaríkjunum.

Hagsmunasamtök álframleiðenda í Kanada segja að um 75 prósent áls sem Bandaríkjamenn flytji inn komi frá Kanada.

Hann hélt því einnig aftur fram að Bandaríkin niðurgreiddu Kanada einhvern veginn og að ríkið reiddi sig á varnir Bandaríkjanna.

Sjá einnig: Í­trekar að honum er al­vara um Kanada

Þá sagði hann það besta sem Kanadamenn gætu gert væri að leyfa Bandaríkjunum að innlima ríkið og gera það að 51. ríki Bandaríkjanna. Þessu hefur hann ítrekað haldið fram og ráðamenn í Kanada segja að honum sé alvara. Hann vilji eignast Kanada og ætli að beita efnahagslegu valdi Bandaríkjanna til að ná því markmiði sínu.

Wall Street Journal segir virði hlutabréfa í Bandaríkjunum hafa tekið kipp niður á við eftir yfirlýsingu Trumps. Mest hafi lækkunin orðið hjá iðnaðar- og fjármálafélögum í Bandaríkjunum. Það sama á við hlutabéf bílafyrirtækja í bæði Bandaríkjunum og í Kanada.

Fer fram á virðingu

Mark Carney, nýr leiðtogi Frjálslynda flokksins og starfandi forsætisráðherra í Kanada, sagði eftir að hann tryggði sér embættið á sunnudaginn að ríkisstjórn hans muni viðhalda tollum þar til Bandaríkjamenn sýni íbúum Kanada virðingu og taki þátt í alvarlegum viðræðum um trúverðugar og áreiðanlegar skuldbindingar varðandi frjáls viðskipti.

Sjá einnig: Seðlabankastjórinn Carney verður for­sætis­ráð­herra Kanada

„Bandaríkin eru ekki Kanada. Og Kanada mun aldrei verða hluti af Bandaríkjunum á neinn hátt,“ sagði Carney þegar hann ávarpaði stuðningsmenn sína á sunnudaginn.

Kannanir í Kanada hafa sýnt að íbúum Kanada er verulega illa við hugmyndir Trumps um að ríkið gangi inn í Bandaríkin og hafa ummæli forsetans bandaríska reitt fólk til reiði. Bandarískar vörur hafa víða verið fjarlægðar úr hillum í Kanada.

Fréttin hefur verið uppfærð vegna nýrrar færslu Trumps um Kanada.