Spáin fyrir Pepsi Max kvenna 2020: Fallbaráttan (8. til 10. sæti)

Íþróttadeild Vísis og Stöðvar 2 Sports spáir fyrir um gengi liðanna í Pepsi Max-deild kvenna en keppni í deildinni hefst með leik Íslandsmeistara Vals og KR föstudagskvöldið 12. júní.

Fyrst skoðum við þrjú neðstu liðin í spá okkar en það eru liðin sem við teljum að séu að berjast fyrir því að spila áfram í Pepsi Max deild kvenna 2021.

Nýliðarnir verða báðir í fallbaráttunni í sumar en þetta lítur samt mun betur út fyrir annað liðið. Með þeim í baráttunni um áframhaldandi sæti í deildinni á næsta ári verður lið sem svo gott sem skipti út öllum sínum lykilleikmönnum í vetur.

FH-liðið hefur bætt mun meira við sig en lið Þróttara sem ætlar að treysta að mestu á stelpurnar sem komu liðinu upp. Eyjamenn hafa aftur á móti skipt algjörlega út liðinu sem skilaði félaginu bikarmeistaratitli haustið 2017.

Þróttur í 10. sæti: Erfitt sumar fyrir nýliðana

Þróttur vann 1. deildina með glæsibrag í fyrra en það er mikill munur á deildunum tveimur og Þróttur hefur alls ekki bætt nægilega mikilli reynslu við sitt reynslulitla lið.

Þróttur er aftur komið upp í deild þeirra bestu eftir fimm ára fjarveru en liðið átti frábært sumar 2019 þar sem liðið náði í 45 stig og skoraði 74 mörk í 18 leikjum.

Þar munaði miklu um samvinnu þeirra Lauren Wade og Lindu Lífar Boama í framlínunni sem brutu báðar tuttugu marka múrinn og voru saman með 42 mörk í deildinni. Það hefði verið spennandi að sjá samvinnu þeirra í sumar en Lauren Wade fór til skoska liðsins Glasgow City í vetur og spilar ekki í Þróttarabúningnum í sumar.

Þróttur hefur endað í tíunda og síðasta sæti á síðustu þremur tímabilum sínum í efstu deild (2011, 2013 og 2015) og á enn eftir að ná því að halda sæti sínu í deildinni.

Þróttur hefur ekki bætt við mikilli reynslu við hópinn og ætlar áfram að veðja að mestu á liðið sem kom félaginu aftur upp meðal þeirra bestu. Það kemur samt reynsla með Eddu Garðarsdóttur sem réði sem aðstoðarþjálfara hjá Þróttaraliðinu en Nik Anthony Chamberlain verður áfram aðalþjálfari.

Það er stórt skref að stíga upp í Pepsi Max deildina og við sjáum ekkert í spilunum hjá Þrótti að þær hafi burði til að halda sér uppi. Þær geta vissulega bitið frá sér en stigasöfnunin verður ekki nóg til að tryggja Pepsi Max deildina að ári.

Síðasta tímabil

Þróttarakonur ættu að koma upp með bullandi sjálfstraust eftir magnað tímabil í Inkasso-deildinni í fyrra. Þróttur byrjaði deildina á 10-0 sigri í fyrsta leik og vann síðan 15 af 18 leikjum sínum.

Á endanum varð Þróttur sex stigum á undan FH-liðinu sem fleiri höfðu spáð sigri í deildinni. Þróttarakonur voru sannfærandi sigurvegarar í deildinni en mældu sig aldrei á móti Pepsi Max liði í bikarnum því þær duttu út á móti b-deildarliði ÍA í sextán liða úrslitum Mjólkursbikarsins.

Liðið og leikmenn

Þróttur hefur ekki verið í hópi þeirra bestu í fimm ár. Þróttur þurfti því nauðsynlega á miklum liðstyrk að halda í vetur.

Liðið hefur fengið til sín tvo bandaríska leikmenn sem verða í risahlutverkum og þá eru örugglega miklar væntingar gerðar til nítján ára miðjumanns frá Ástraíu. Laura Hughes hélt samt um tíma að hún væri strand hinum megin á hnettinum vegna COVID-19.

Missirinn í Lauren Wade er samt mikill og alltof margir leikmenn liðsins eiga eftir að sanna sig í deildinni. Ein af þeim er unglingalandsliðskonan Ólöf Sigríður Kristinsdóttir frá Val en Þróttarar fá þennan efnilega framherja að láni frá Hlíðarenda.

Gæti sprungið út

Álfhildur Rósa Kjartansdóttir er yngsti fyrirliði Pepsi Max deildarinnar en hún heldur ekki upp á tvítugsafmælið sitt fyrr en í desember. Álfhildur Rósa fær mikla ábyrgð inn á miðju Þróttaraliðsins í sumar en hún er ein af þeim sem léku með liðinu þegar Þróttur var síðast í úrvalsdeildinni fyrir fimm árum.

Sérfræðingur Pepsi Max marka kvenna segir ...

Kristín Ýr Bjarnadóttir fer yfir möguleika Þróttar í Pepsi Max-deild kvenna í sumar.

ÍBV í 9. sæti: Flótti frá Eyjum og gerbreytt lið

Ef eitthvað lið er algjör spurningarmerki í sumar þá er það lið ÍBV úr Eyjum. Knattspyrnuhléið vegna kórónuveirunnar og mikill flótti úr ÍBV-liðinu þýðir að gerbreytt ÍBV-lið mætir til leiks og lið sem fáir hafa séð mikið af.

ÍBV hefur misst íslenska kjarnann sinn því Sigríður Lára Garðarsdóttir, Clara Sigurðardóttir, Kristín Erna Sigurlásdóttir og Ingibjörg Lúcía Ragnarsdóttir voru allar í stórum hlutverkum en eru farnar í önnur lið í deildinni.

Þrír sterkir erlendir leikmenn eru heldur ekki lengur með liðinu. Varnarmaðurinn Caroline Van Slambrouck og miðjumaðurinn Emma Kelly sömdu ekki aftur og þá yfirgaf Cloé Lacasse ÍBV í lok júlí.

Cloé Lacasse skoraði 11 af 21 marki ÍBV í fyrstu tólf leikjunum og ÍBV bætti aðeins við átta mörkum í sex leikum eftir að hún fór þar af þrjú á heimavelli á móti lélegasta liði deildarinnar.

Erlendir leikmenn verða í meirihluta í Eyjaliðinu í sumar og ekki ólíklegt að sjö byrji leikina. Hvernig þær passa inn í menningu Eyjanna og leikstíl deildarinnar mun ráða miklum um örlög liðsins.

Það er ekkert eftir að Eyjaliðinu sem vann bikarmeistaratitilinn sumarið 2017 og miðað við hrunið í fyrra gæti þetta sumar orðið varhugavert í Vestmannaeyjum. Við spáum því að hlutskipti Eyjakvenna verði það sama og hjá körlunum í fyrra eða fall í B-deild.

Síðasta tímabil

ÍBV var aðeins fimm stigum frá falli úr deildinni i fyrra og því mátti ekki miklu muna. Liðið lækkaði sig um þrjú sæti frá tímabilinu á undan eftir að hafa verið fastagestur í fimmta sætinu í mörg ár.

ÍBV tapaði aðeins einum leik minna en fallið Keflavíkur en það munaði öllu að Eyjastelpur unnu báða innbyrðis leiki liðanna, 2-0 í Keflavík og 3-2 í Eyjum. Það voru þessi sex stig sem réðu því umfram öll önnur að Eyjakonur spiluðu áfram í deild þeirra bestu.

Liðið og leikmenn

Þegar þú missir jafnmikið af kjarnaleikmönnum og ÍBV í vetur þá er nauðsynlegt að safna liði. Eyjamenn hafa safnað til síns mörgum erlendum leikmönnum í vetur þar af þremur landsliðskonum frá Lettlandi sem byrjuðu allar inn á vellinum þegar Ísland vann 6-0 sigur á Lettlandi síðasta haust. Ein af þeim er hin tvítuga Karlina Miksone sem er mjög efnilegur miðjumaður.

Að auki kemur til liðsins Tyrkinn Fatma Kara frá HK/Víkingi sem spilaði í Pepsi Max deildinni á síðustu leiktíð og þá er ÍBV-liðið að fá til síns bandarískan varnarmann þýskan miðjumann og franskan framherja. Fatma Kara fær mikla ábyrgð því hún hefur strax verið gerð að fyrirliða Eyjaliðsins.

Nú síðast bættist bandaríski framherjinn Miyah Wat­ford í hópinn og erlendir leikmenn ÍBV liðsins eru því orðnir átta talsins.

ÍBV þarf að vera mjög heppið með þessa erlendu leikmenn ef liðið ætlar eitthvað að bíta frá sér í sumar. Það reynir mjög mikið á nýjan þjálfara að setja saman nýtt lið. Andri Ólafsson er ekki öfundsverður af því verkefni.

Gæti sprungið út

Markvörðurinn Auður Sveinbjörnsdóttir Scheving kemur úr Val á láni. Hún er aðeins sautján ára gömul og hefur verið varamarkvörður Vals undanfarin þrjú ár. Auður hefur aftur á móti talsverða reynslu úr yngri landsliðum og á alls 21 leik fyrir íslensku yngri landsliðin þar af tíu þeirra fyrir 19 ára landsliðið.

Sérfræðingur Pepsi Max marka kvenna segir ...

Kristín Ýr Bjarnadóttir fer yfir möguleika ÍBV í Pepsi Max-deild kvenna í sumar.

FH í 8. sæti: Hafnfirðingar hafa sótt sér reynslukonur á miðjuna

FH-liðið kláraði verkefnið í fyrra og komst upp en vann þó ekki B-deildina eins og flestir bjuggust við. FH-liðið átti slaka leiki inn á milli og hefur ekki efni á því í deild þeirra bestu.

FH safnaði til sín uppöldum FH-stelpum fyrir tímabilið í fyrra og það gekk upp því liðið endurheimti úrvalsdeildarsætið. Nú var farin aðeins önnur leið.

FH hefur styrkt liðið talsvert í vetur og sótt sér reynslubolta úr efstu deild. Mestu munur um þær Sigríði Láru Garðarsdóttur úr ÍBV og Andrea Mist Pálsdóttir úr Þór/KA sem hafa ekki aðeins reynslu úr úrvalsdeildinni heldur hafa einnig reynt fyrir sér erlendis.

Ólíkt Þrótti þá var FH-liðið ekki með leikmenn sem börðust um markakóngstitilinn og sú markahæsta í Kaplakrika var hin sextán ára gamla Birta Georgsdóttir með 11 mörk. Þróttur átti aftur á móti tvo tuttugu marka leikmenn.

Síðasta tímabil

FH-konur komu strax aftur upp í deild þeirra bestu en liðið var í mikli basli undir lok móts. FH-liðinu tókst loksins að tryggja sig upp í Pepsi Max deildina með 1-0 útisigri á Aftureldingu í lokaumferðinni.

Margrét Sif Magnúsdóttir skoraði sigurmarkið fjórtán mínútum fyrir leikslok. FH-liðið hafði aðeins fengið eitt stig í síðustu þremur leikjum sínum fyrir lokaumferðina. FH var með tíu stiga forskot á þriðja sætið eftir fjórtán umferðir en fyrir lokaleikinn munaði aðeins tveimur stigum á Hafnarfjarðarliðinu og Tindastól.

Liðið og leikmenn

FH fær mikla innspýtingu inn á miðjuna í þeim Sigríði Láru Garðarsdóttur og Andreu Mist Pálsdóttur sem hafa mikla reynslu og hafa báðar verið í kringum íslenska landsliðið.

Þessi viðbót gefur liðinu tækifæri á að taka næsta skref og reyna að festa sig í sessi í efstu deild. Hrafnhildur Hauksdóttir er síðan þriðji leikmaðurinn með talsverða reynslu úr Pepsi Max deildinni. Koma markvarðarins efnilegu Telmu Ívarsdóttir gæti einnig hjálpað liðinu mikið.

Gæti sprungið út

Framherjinn Birta Georgsdóttir spilaði stórt hlutverk í að koma FH-liðinu aftur í hóp þeirra bestu með því að skora 11 mörk í 16 leikjum í B-deildinni í fyrra. Birta er enn bara átján ára gömul og fær nú tækifæri til að sanna sig sem markaskorari í Pepsi Max deildinni. FH gæti þurft á mörkum hennar að halda og með meiri reynslubolta inn á miðjunni gæti það skilað Birtu fleiri góðum boltum í framlínunni.

Sérfræðingur Pepsi Max marka kvenna segir ...

Bára Kristbjörg Rúnarsdóttir fer yfir möguleika FH í Pepsi Max-deild kvenna í sumar.