„Gekk út sexhundruð þúsund krónum ríkari“

Síðustu árin hefur það verið nokkuð þekkt að starfsfólk getur sótt um endurgreiðslustyrki fyrir ýmiss námskeið til stéttafélaga sinna. Lísbet Einarsdóttir segir að það sama sé upp á teningnum fyrir fyrirtæki en því miður sé það of algengt að fyrirtæki viti ekki af þessum rétt sínum. Lísbet Einarsdóttir er framkvæmdastjóri Starfsafls sem er annar stærsti sjóður landsins. Starfsafl greiðir allt að 90% af útlögðum kostnaði fyrirtækja fyrir námskeið, gerð fræðsluefnis, stjórnendaþjálfun og fleira sem fyrirtæki standa að fyrir starfsmenn sína. 

Hámarksstyrkur á ári eru 3 milljónir króna en of algengt er að það séu alltaf sömu fyrirtækin sem nýti þennan rétt sinn því svo mörg fyrirtæki viti ekki af honum.

Sem dæmi nefnir Lísbet framkvæmdastjóri verktakafyrirtækis sem kom til þeirra á fund og gekk út sexhundruð þúsund krónum ríkari. 

Hann vissi ekki fyrir fundinn að fyrirtækið hans gæti fengið endurgreiðslu vegna tveggja starfsmanna sem fyrirtækið hafði styrkt til meiraprófs,“ 

segir Lísbet.

Einn á launaskrá er nóg

Lísbet segir Starfsafl annan stærsta sjóð landsins sem þjónustar yfir þrjátíu þúsund félagsmenn hjá um 3.500 fyrirtækjum. Starfsafl þjónustar fyrirtæki sem eru með starfsfólk í Eflingu, VSFK og Verkalýðsfélaginu Hlíf í Hafnarfirði en starfi auk þess náið með öðrum sjóðum, s.s. SVS og Landsmennt. Saman reka þessir aðilar vefgáttina www.attin.is, þar sem umsóknarferli styrkja er afar einfalt.

„Rétturinn myndast sjálfkrafa um leið og launatengd gjöld starfsmanns eru greidd. Einfaldara getur þetta ekki verið,“ segir Lísbet og bætir við „Það er ákveðinn vandi sem fylgir því hversu mörg fyrirtæki hér á landi er lítil eða meðalstór og þá er oft enginn einn sem sér um mannauðs- og fræðslumál.

En það er bara þannig að um leið og einn starfsmaður er kominn á launaskrá þá þarf að huga að þeim þætti í rekstrinum sem snýr að mannauðsstjórnun og gefa rými fyrir starfsþróun.

Í því felst að bjóða upp á fræðslu við hæfi og það ætti að vera öllum fyrirtækjum mögulegt þegar allt að 90% af reikningi er endurgreiddur í formi styrks,“ segir Lísbet. 

Að hennar sögn voru styrktargreiðslur hækkaðar tímabundið í kjölfar kórónufaraldurs og nemur styrktarhlutfall því 90% í stað 75% áður.

57 milljónir greiddar til fyrirtækja í fyrra

Lísbet segir Starfsafl styrkja alla starfstengda fræðslu, áskrift að stafrænu námsumhverfi, gerð námsefnis, markþjálfun og hópefli svo dæmi séu tekin. Þá er boðið upp á fræðslustjóra að láni en þetta er þjónusta sem Starfsafl hefur boðið upp á síðastliðin tíu ár og um hundrað fyrirtækí nýtt sér á þeim tíma.

Lísbet hvetur fyrirtæki til að nýta sér styrki Starfsafls, ekki síst nú á tímum samdráttar. Að hennar sögn greiddi Starfsafl tæpar 280 milljónir króna í styrki í fyrra til fyrirtækja og einstaklinga. Af þessum 280 milljónum, voru 57 milljónir króna sem greiddar voru beint til fyrirtækja en hámarksgreiðsla sem hvert fyrirtæki getur fengið eru 3 milljónir króna á ári.

Dæmi um styrki

„Við viljum að öll fyrirtæki fullnýti rétt sinn, á hverju ári,“ segir Lísbet enda sé það alltaf jafn ánægjulegt þegar einhver hringir inn eða kemur sem vissi ekki af þessum réttindum áður.

„Nú síðast var það til dæmis lítið fyrirtæki sem fékk greidda eina milljón króna í styrk og var það vegna reikninga sem voru gefnir út fyrir nær ári síðan en við tökum við allt að ársgömlum reikningum. Í þessu tilfelli var nýr starfsmaður að rýna í bókhaldið og gamla reikninga og sá að þarna var hægt að gera betur.

Önnur saga segir af framkvæmdastjóra vertakafyrirtækis sem kom á fund til okkar og gekk út sexhundruð þúsund krónum ríkari. Hann vissi ekki fyrir fundinn að fyrirtækið hans gæti fengið endurgreiðslu vegna tveggja starfsmanna sem fyrirtækið hafði styrkt til meiraprófs. Hann var að vonum mjög ánægður.

Þær eru margar svona sögurnar og það ánægjulegasta er þegar fyrirtæki átta sig á umhverfinu og hversu einfalt þetta er, þá halda þessi sömu fyrirtæki áfram, leggja jafnvel enn meira í fræðslu sinna starfsmanna, vitandi að Starfsafl er þeirra bakhjarl. Þá er tilganginum náð,“ segir Lísbet.

Hækkun styrkja til 30.september 2020

Telur þú að fyrirtæki ættu að horfa sérstaklega til þess nú að senda starfsfólk á námskeið þegar minna er um að vera í fyrirtækjum í kjölfar kórónuveirunnar og samdráttarskeiðs?

„Alveg tvímælalaust og þau hafa mörg hver verið að gera það en það má alltaf gera betur.

Mörg fyrirtæki hafa verið að nýta tímann undanfarnar vikur og mánuði til fræðslu en hafa hagað seglum eftr vindi, þ.e. boðið uppá stafræna fræðslu, sem við styrkjum alveg til jafns við hefðbundna fræðslu sem fer fram á gólfi.

Við héldum að það myndi draga mikið úr umsóknum en það hefur alls ekki verið svo. Við fórum reyndar þá leið, til að mæta núverandi ástandi, að hækka styrkhlutfallið úr 75% í 90% fram til 30. september, sem viðbragð við því ástandi sem ríkir í samfélaginu og það hefur gefist mjög vel,“ segir Lísbet.

Lísbet segir mörg fyrirtæki hafa lausan tíma um þessar mundir sem tilvalið er að nýta til starfsþróunar og bæta þá hæfni og þekkingu sem vantar en oft gefst ekki tími til. Þannig geti fyrirtæki mætt enn sterkari til leiks þegar samdráttarskeiði lýkur.

Ef við gefum okkur t.d. fyrirtæki í ferðaþjónustu, með 25 starfsmenn og alla í Eflingu eða VR, þá þarf fyrirtækið aðeins að greiða 10% af kostnaði námskeiðs, annar kostnaður er endurgreiddur af þessum sjóðum,“ 

segir Lísbet og spyr: „Hvaða rekstraraðili snýr baki slíku tækifæri?“

Hvers konar námskeið eru vinsælust fyrir fyrirtæki að senda sitt fólk á?

„Þau stéttafélög sem standa að Starfsafli eru stéttafélög einstaklinga sem starfa í fiskvinnslu, afgreiðslu á veitingastöðum, þjónustu ýmiskonar og þrifum, þernur, öryggisverðir og bílstjórar. Námskeiðin bera því keim af þeim störfum og þeirri samsetningu.

Hátt í helmingur félagsmanna er til dæmis með annað tungumál en íslensku sem sitt móðurmál og því eru íslenskunámskeið mjög vinsæl og frábært að sjá hversu mörg fyrirtæki fjárfesta í sínu starfsfólki með því að bjóða upp á íslenskunám á vinnustað og eða greiða fyrir það starfsfólk sem kýs að fara á íslenskunámskeið utan vinnutíma. Það er svo gríðarlega mikilvægt og hluti af því að aðlagast samfélaginu,“ segir Lísbet.

Þá segir hún færast í aukana að fyrirtæki séu að kaupa fræðslu inn í fyrirtækin sem snerta heilsu og öryggi eða nýliðafræðslu. Allt sé þetta mikilvæg fræðsla og eins séu mörg fyrirtæki að búa sig undir mögulegar breytingar á störfum í kjölfar fjórðu iðnbyltingarinnar.

Námskeið í leiðtogafærni, stjórnun, sölu og þjónustu, gæðastjórnun, tölvufærni og fleira séu líka dæmi um námskeið sem hægt er að sækja um styrki fyrir.

„Mestu máli skiptir að horfa á fræðslumál fyrirtækisins heilt yfir. Í því felst að stjórnendur þurfa að vera framsýnir og samhliða því að draga upp sviðsmyndir af rekstrinum þá þurfa þeir að fara í greiningu á fræðsluþörfum með tillitil til markmiða og stefnu fyrirtækisins og hagsmuna starfsfólks, draga upp fræðsluáætlun og sækja til Starfsafls og annarra sambærilegra sjóða þá þjónustu og styrki sem boðið er upp á,“ segir Lísbet og hvetur fyrirtæki til að kynna sér málin.