Lífið

Erfitt en mikilvægt að taka athugasemdum ekki persónulega

Dóra Júlía Agnarsdóttir skrifar
Guðlaug Sóley, Gugusar, er viðmælandi vikunnar í Innblæstrinum.
Guðlaug Sóley, Gugusar, er viðmælandi vikunnar í Innblæstrinum. @nesmanbrekii

Tónlistarkonan Guðlaug Sóley, þekkt undir listamannsnafni sínu Gugusar, skaust upp á stjörnuhimininn fyrir skömmu síðan og hefur spilað víðs vegar um landið. Gugusar elskar beyglur, umkringir sig góðu fólki og endar eiginlega alla daga í stúdíóinu sínu að semja tónlist. Gugusar er viðmælandi vikunnar í Innblæstrinum.

Innblásturinn er fastur liður hjá Lífinu á Vísi þar sem rætt er við ólíkt fólk um hvað veitir því innblástur í tilverunni og hvaða ráðum þau luma á varðandi andlega heilsu.

Hver ert þú í þínum eigin orðum?

Ég er ungur listamaður að hafa gaman.

Hvað veitir þér innblástur?

Hljómsveitin Injury Reserve er minn helsti innblástur í tónlist. Einu sinni var ég að hlusta á plötuna þeirra og ákvað á meðan ég var að hlusta að ég ætlaði að byrja að semja tónlist sjálf.

Hvað er þitt besta ráð til að næra andlega heilsu?

Mitt besta ráð þegar það kemur að andlegri heilsu er að umkringja sig fólki sem þú virkilega vilt umkringjast og slíta samböndum við fólk sem dregur þig meira niður.

Hvernig er hefðbundinn dagur í þínu lífi?

Dagarnir mínir eru svo rosalega mismunandi. Alltaf eitthvað nýtt að gerast eða öðruvísi verkefni sem ég fæ. 

En ég enda eiginlega hvern einasta dag upp í stúdíóinu mínu að semja tónlist.

Uppáhalds lag og af hverju?

Uppáhalds lagið mitt núna er Mercury með Steve Lacy. Það er alveg ótrúlega gott. Er að hlusta á það á repeat núna.

Uppáhalds matur og af hverju?

Uppáhalds maturinn minn er beygla. Ég elska beyglur og er á Deig í þessum skrifuðu orðum. Beygla er bara svo einföld, létt og þægileg.

Besta ráð sem þú hefur fengið?

Besta ráð sem ég hef fengið er klárlega að ekki taka athugasemdum persónulega þegar það kemur að tónlist, þótt það geti verið erfitt.

Hvað er það skemmtilegasta við lífið?

Mér finnst persónulega það skemmtilegasta við lífið vera fjölskyldan, vinir og tónlist.

Innblásturinn Tónlist

Tengdar fréttir

„Ég gef ekki ráð“

Bjarni Snæbjörnsson er lífskúnstner mikill en hann hefur sem dæmi vakið athygli fyrir söngleik sinn Góðan daginn faggi ásamt því að syngja Pride lagið í ár, Næs. Fyrir Bjarna er sannleikurinn mesti innblásturinn og hann elskar að læra eitthvað nýtt um sjálfan sig. Bjarni á enga hefðbundna daga og elskar hreyfingu, hollan og góðan mat og hugleiðslu. Bjarni Snæbjörnsson er viðmælandi vikunnar í Innblæstrinum.

„Það er enginn að fara að lifa þessu lífi fyrir þig“

Helga Hvanndal Björnsdóttir er heimspekimenntaður landvörður sem býr yfir ólæknandi ferðaþrá og hefur ferðast víðs vegar um heiminn. Á undanförnum árum hefur Helga Hvanndal verið búsett á ýmsum stöðum, erlendis og í afskekktri íslenskri náttúru, og segir morgunkaffið eina örugga fasta liðinn í hennar lífi. Hún starfaði sem sushi kokkur í dágóðan tíma áður en ævintýraþráin heltist yfir hana og segir bæði sushi og pizzu vera hennar uppáhalds mat. Helga Hvanndal er viðmælandi vikunnar í Innblæstrinum.

„Mikilvægara að sleppa tökunum á hlutum heldur en að fá eitthvað nýtt“

Bergþór Másson er lífskúnstner mikill sem starfar sem umboðsmaður fyrir vinsæla rappara og tónlistarmenn hérlendis. Einnig stýrir hann hlaðvarpinu Skoðanabræður, stundar meistaranám við ritlist og hugar vel að líkama og sál. Bergþór Másson er viðmælandi vikunnar í Innblæstrinum.

„Ég leyfi mér að dreyma“

Leikkonan og lífskúnstnerinn Katla Þórudóttir Njálsdóttir hefur vakið athygli fyrir sköpunargleði sína í íslensku samfélagi, meðal annars með þátttöku sinni í Söngvakeppni Sjónvarpsins og í hlutverki sínu í sjónvarpsseríunni Vitjanir. Katla leyfir sér að dreyma, reynir alltaf að hafa eitthvað að gera og reynir að hafa húmorinn í fyrirrúmi. Katla er viðmælandi vikunnar í Innblæstrinum.

„Margt verra en smá brussugangur“

Eva Ruza er lífskúnstner með meiru en hún hefur haslað sér völl í skemmtanabransanum á Íslandi á undanförnum árum. Pizza er umhugsunarlaust uppáhalds maturinn hennar og hún segist geta fundið innblástur í hvaða verkefni sem er. Eva Ruza er viðmælandi vikunnar í Innblæstrinum.



Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.