Báðir hvalbátarnir eru núna á leið til hafnar í Hvalfirði með nýveidda hvali, sem skotnir voru í dag. Hvalur 8 er væntanlegur að bryggju í hvalstöðinni í nótt með eina langreyði. Hvalur 9 er svo væntanlegur þangað í fyrramálið með tvær langreyðar. Eftir því sem fréttastofa kemst næst veiddi áhöfn Hvals 8 sinn hval fyrir hádegi.
Þar með hafa alls fjórtán langreyðar veiðst frá því hvalveiðarnar hófust í síðustu viku. Fyrstu þrír hvalir vertíðarinnar voru skotnir fimmtudaginn 7. september. Næstu fjórir veiddust síðastliðinn sunnudag og aðrir fjórir á þriðjudag.
Matvælastofnun tilkynnti fyrr í dag að hún hefði ákveðið að stöðva tímabundið veiðar Hvals 8 og má því búast við að hann sigli ekki strax aftur á miðin. Þá gæti einnig orðið hlé á veiðum Hvals 9 þar sem veðurspá laugardagsins gerir ráð fyrir suðaustan slagviðri.
Matvælastofnun hefur stöðvað tímabundið veiðar Hvals 8 vegna alvarlegra brota á velferð dýra við veiðar á langreyði.
Hörkugangur er í hvalveiðunum og veiddust fjórar langreyðar í gær. Áhafnir hvalbátanna beggja hafa núna skotið alls ellefu dýr á sex dögum.
