Hvað gerði Diddy? Man­sal, of­beldi og sam­særis­kenningar um Justin Bieber

Eftir að rapparinn var handtekinn þann 17. september hafa samsæriskenningar um hegðun hans og sambönd við aðra tónlistarmenn farið á flug á samfélagsmiðlum. Þar ber einna hæst sögusagnir um það að hann hafi átt í óeðlilegu sambandi við kanadíska poppgoðið Justin Bieber á unga aldri og það fyrir tilstilli tónlistarmannsins Usher.

Hér verður farið yfir meint brot rapparans, þau sem hann hefur fengið ákæru fyrir og staðfest er að séu til rannsóknar af hálfu lögreglu og svo þau sem ekki er hægt að kalla annað en samsæriskenningar á þessum tímapunkti og hafa einungis verið nefnd á samfélagsmiðlum.

Áralöng saga meintra brota

Undanfarið ár hefur hinn 54 ára gamli rappari setið undir röð ásakana og stefna vegna meintra kynferðisbrota sinna, þar sem börn hafa sem dæmi verið sögð hafa komið við sögu. Rapparinn hefur verið frægur í meira en þrjátíu ár og er þess getið í umfjöllun BBC að einungis séu tvö ár síðan hann hélt upp á þrjátíu ára afmælið í stjörnu prýddu partýi í Beverly Hills.

Svo virðist vera sem ákvörðun fyrrverandi kærustu hans tónlistarkonunnar Cassie Ventura um að stefna honum í nóvember í fyrra hafi orðið öðrum meintum fórnarlömbum hans innblástur til þess að segja frá. Eftir stefnu hennar í nóvember telst fréttastofu til að í hið minnsta ellefu manns hafi stefnt rapparanum fyrir meint kynferðisofbeldi. Hin meintu brot ná yfir þó nokkuð mörg ár og hefjast miðað við frásagnirnar á tíunda áratugnum.

Hér að neðan ber að líta tímalínuna í rannsókn á málum rapparans:

Þess ber að geta að rapparinn hefur alla tíð neitað sök, jafnvel þó að ásakanirnar og stefnurnar hrannist upp eins og um gorkúlur sé að ræða. Lögmenn hans hafa bent á að Combs hafi sýnt fullan samstarfsvilja allan tímann. Combs sé ekki fullkomin manneskja en hann sé samt ekki glæpamaður.

Combs situr nú í fangaklefa og á ekki möguleika á reynslulausn. Ástæðan að sögn dómarans Andrew L Carter Jr er sú að yfirvöld óttast að tónlistarmaðurinn muni reyna að ná til vitna. Vitnaleiðslur standa nú yfir en Combs mun næst mæta fyrir dómara þann 9. október næstkomandi og mun þar mæla fyrir sakleysi sínu.

Var Justin Bieber eitt fórnarlambanna?

Eftir að Combs var handtekinn hafa ýmsar samsæriskenningar farið á flug á samfélagsmiðlum. Ekki síst vegna gríðarlegra tengsla rapparans við heim frægðarmenna og tíðra samkvæma þar sem stjörnurnar voru duglegar að mæta. Hafa ýmsar spurningar vaknað um hegðun rapparans undanfarin ár og um það hvort einhverjar stjörnur hafi vitað meira um málið án þess að segja nokkuð.

Hafa sérstaklega verið birtir listar sem sagðir eru vera yfir þær stjörnur sem sótt hafi teiti rapparans undanfarin ár. Þá hefur á samfélagsmiðlum sérstöku kastljósi verið varpað á vináttu hans við tónlistarmenn líkt og Jay-Z, Usher og Justin Bieber.

Samband rapparans við þann síðastnefnda er líklega það sem vakið hefur mesta athygli netverja ekki síst vegna fullyrðinga tónlistarkonunnar Jaguar Wright í myndböndum á samfélagsmiðlum. Þar fer hún mikinn og fullyrðir meðal annars að tónlistarmaðurinn Usher hafi tryggt rapparanum aðgengi að Bieber þegar hann sló í gegn fimmtán ára gamall.

Bieber var á þessum árum á mála hjá útgáfufyrirtæki Usher. Þar kynntist hann rapparanum Combs sem var einmitt sjálfur lærifaðir Usher á sínum tíma.

Þannig hafa gömul myndbönd af Bieber og Combs farið í mikla dreifingu. Eitt þeirra frá árinu 2009 fjallar sérstaklega um að þeir hafi eytt tveimur heilum sólarhringum saman en í myndbandinu sést Combs meðal annars gefa Bieber sportbíl. „Ég hef fengið forræði yfir honum,“ segir Combs meðal annars í myndbandinu. „Hann er á mála hjá Usher og ég var með forræði yfir Usher þegar hann gerði fyrstu plötuna sína. Ég gerði fyrstu plötu Ushers. Við ætlum alla leið. Alla klikkuðu leiðina.“

Wright fullyrðir að Combs hafi „groom-að“ Bieber og ýjar að því að hann hafi brotið á honum kynferðislega. Ekkert af þessu hefur verið fullyrt í virtum erlendum fjölmiðlum. Sky News lætur þess þó getið að myndbandið af 48 tíma ferðalagi þeirra Bieber og Combs hafi farið í mikla dreifingu á miðlunum.

Þá hefur annað myndband af þeim sem tekið er upp ári síðar, 2010 einnig fengið þó nokkra dreifingu. Þar virðist vera sem þeir séu ekki eins nánir og ári áður og stemningin hreinlega óþægileg í myndbandinu þar sem Diddy furðar sig á því að Bieber hafi ekkert talað við sig.

„Allt gott að frétta? Að selja allt upp og svona? Byrjaður að haga þér öðruvísi, ha? Þú hefur ekkert hringt í mig og hangið með mér eins og við gerðum alltaf,“ segir rapparinn við Bieber sem er sextán ára þegar þetta er tekið upp. Bieber er hinn vandræðalegasti og segir rapparann einfaldlega ekki hafa verið með númerið hans.

Þá hafa erlendir miðlar rifjað upp þátt úr raunveruleikaþáttaseríunni um Kardashian fjölskyldunni frá árinu 2014. Þar ræðir Khloe Kardashian um teiti sem hún var stödd í kvöldið áður en þátturinn var tekinn upp. „Ég held að helmingurinn í teitinu hafi verið nakinn. Þú hefðir elskað þetta,“ segir Khloe við systur sína Kourtney, sem spyr hverjir voru þar? „Diddy. Quincy. Justin Bieber..“

Það eina sem haft hefur verið eftir Bieber um mál Combs eru svör talsmanna hans til bandaríska tímaritsins People um að Bieber sé þessa dagana að einbeita sér að föðurhlutverkinu. Hann og eiginkona hans Hailey Bieber eignuðust sitt fyrsta barn á dögunum. Segist Bieber því ekki fylgjast sérstaklega með máli rapparans.

Hér að neðan er brot úr myndbandi af samfélagsmiðlum með óstaðfestum fullyrðingum Jaguar Wright um meint samband Bieber og Combs.

Breska götublaðið Daily Mail gengur þó lengra og fullyrðir að Bieber sé í áfalli yfir máli rapparans. Hann skammist sín fyrir samstarf þeirra og eigi í erfiðleikum með að melta fortíð sína, líkt og því er lýst í miðlinum. Er þetta haft eftir ónefndum heimildarmanni sem götublaðið fullyrðir að sé náinn Bieber.

Það varð svo ekki til þess að róa samsæriskenningasmiðina þegar öllum tístum á Twitter/X reikningi tónlistarmannsins Usher var eytt um helgina. Voru margir sannfærðir að þar hlyti að vera staðfesting þess efnis um að eitthvað gruggut væri þar að finna um fortíð Usher og vináttu hans við Diddy. Reikningurinn komst þó aftur í gagnið og útskýrði Usher eftir að tístin birtust aftur að hann hefði einfaldlega orðið fyrir barðinu á tölvuþrjótum.

Hvaða stjörnur voru í teitum P. Diddy?

Þá hafa áleitnar spurningar vaknað um það hvaða tónlistarmenn, leikarar og aðrar stjörnur hafi verið viðstaddar teiti rapparans þar sem vafasamir hlutir áttu sér stað. Til þeirra hefur verið vísað sem svokallaðra „freak-off“ samkvæma, þar sem tilgangurinn hafi verið að bjóða fólki kynferðislegt aðgengi að fólki í mansali.

Starfsfólk Combs hafi bókað hótelsvítur, ráðið kynlífsverkafólk og dreift eiturlyfjum í partýinu, líkt og kókaíni, metamfetamíni og oxykódíni, í þeim tilgangi að þröngva gestum til kynferðislegra athafna og halda þeim undir sinni stjórn, eins og því er lýst í umfjöllun BBC.

Combs hafi svo tekið allt saman upp til þess að tryggja þögn fórnarlamba sinna. Við leit hefur meðal annars fundist mikið magn kynlífsolía sem rapparinn er talinn hafa nýtt í samkvæmunum. Lögmaður hans hefur fullyrt að partýin hafi verið haldin með fullu samþykki allra viðeigandi. „Er þetta kynlífsánauð? Ekki ef allir vilja vera þar.“

Hér að neðan er færsla af samfélagsmiðlinum X með óstaðfestum fullyrðingum um gestalista í teitum rapparans.

Teitin hafa verið viðfangsefni margra kenninga á samfélagsmiðlum og listi yfir meinta gesti gengið manna á milli en hann virðist enn og aftur vera hafður upp úr fullyrðingum tónlistarkonunnar Jaguar Wright. Hún nefnir nöfn eins og Jay-Z, Kim Kardashian, Kanye West, Naomi Campbell, Mary J. Blige, Dr. Dre, Ashton Kutcher og Leonardo Dicaprio svo nokkrir séu nefndir.

Fram kemur í erlendum miðlum að athygli vaki hve fáir innan tónlistar- og kvikmyndbransans hafi tjáð sig um mál rapparans. Það sé til marks um það hve vinsæll hann hafi verið í bransanum og vel tengdur. Óljóst sé með hvaða hætti hvaða stjörnur geti hugsanlega tengst málinu, enda hafi gríðarlegur fjöldi þeirra sótt einhverskonar teiti hjá rapparanum á einum tímapunkti eða öðrum.

Þá hafa börn rapparans ekki farið varhluta af samsæriskenningunum. Þau birtu í gær yfirlýsingu á samfélagsmiðlum þar sem þau fóru hörðum orðum um samsæriskenningar þess efnis að móðir þeirra heitin Kim Porter hefði verið myrt af föður þeirra. Porter lést árið 2018 úr lungnabólgu. Börnin hafna þeim kenningum með öllu og segja það liggja fyrir að andlát móður þeirra hafi ekki borið að með saknæmum hætti.