Eftir 1-1 jafntefli Everton og Arsenal í ensku úrvalsdeildinni í gær var talað um fátt annað en vítaspyrnuna sem Iliman Ndiaye skoraði úr fyrir Everton. Áður hafði Leandro Trossard komið Arsenal í forystuna.
Vítaspyrnan var dæmt eftir viðskipti Jack Harrison og Myles Lewis-Skelly en dómarinn Darren England var ekki lengi að benda á punktinn og dómurinn var síðan staðfestur af VAR.
Vítaspyrnan var í besta falli vafasöm og var knattspyrnustjóri Arsenal, Mikel Arteta, allt annað en sáttur í leikslok.
„Ég er 100% pirraður,“ sagði Arteta í viðtali við BBC eftir leik.
🗣️ David Moyes on Mikel Arteta saying he’s watched the penalty back 15 times, and disagrees with the call: “I've watched it zero times and I couldn't tell you if it's a penalty or not!” ❌🤷♂️ pic.twitter.com/sJ217JBdO5
— DailyAFC (@DailyAFC) April 5, 2025
„Við vorum algjörlega með stjórn á leiknum. Við vorum að vonast til þess að halda yfirburðunum áfram í seinni hálfleik en upp úr þurru ákveður dómarinn að dæma vítaspyrnu.“
Mark Everton kom á upphafsmínútum síðari hálfleiks og virtist slá Arsenal út af laginu.
„Ég er búinn að sjá þetta fimmtán sinnum, að mínu mati er þetta aldrei víti. Þeir eru mjög góðir í því sem þeir gera. Við gáfum þeim margar klaufalegar aukaspyrnur en þeir sköpuðu ekki neitt.“
