Bein útsending frá Masters-mótinu hefst klukkan 19:00 í kvöld. Sýnt verður frá mótinu daglega á Stöð 2 Sport 4.
Allir kylfingarnir sem taka þátt eiga sína sögu. Bernhard Langer verður elstur, 67 ára, og tekur þátt á sínu síðasta móti í ár, 40 árum eftir að hann vann mótið fyrst. Fjallað hefur verið Angel Cabrera sem missti af þónokkrum Masters-mótum sökum þess að hann sat í fangelsi, og er ný búinn að fagna sigri á PGA-móti.
Fylgjast má þó sérlega vel með þessum tíu kylfingum á Masters:
10. Jordan Spieth
Í ár eru tíu ár frá því að Spieth fagnaði sigri á Masters, árið 2015. Sá Spieth er ekki sá sami og við sjáum á brautinni í ár. Hann er áratug eldri, gengið misvel síðustu ár og á til að vera sveiflukenndur í spilamennsku. Hann hefur þó verið tvisvar á meðal þeirra fjögurra efstu á síðustu fjórum Masters-mótum. Áhugavert verður að sjá hvaða Spieth mætir til leiks í ár.
9. Ludvig Åberg
Sænski stuðboltinn sló í gegn í fyrra og lenti í öðru sæti í frumraun sinni á Augusta-vellinum. Það var jafnframt fyrsta risamótið á ferli hans. Hann hefur hins vegar verið í brasi, komst ekki í gegnum niðurskurð síðustu tvær vikur. Það er spurning hvort hann haldi slíku áfram eða geti byggt á árangurinn á Masters í fyrra.
8. Phil Mickelson
Aldrei sofa á Lefty. Mickelson hefur unnið mótið þrisvar og var annar á mótinu fyrir tveimur árum. Skiptar skoðanir eru á kauða en það fylgjast allir með Phil þegar hann mætir á völlinn.
7. Brooks Koepka
Lenti í öðru sæti fyrir tveimur árum og vann svo PGA-meistaramótið sama ár. Er í mismiklu stuði á LIV-túrnum og stígur yfirleitt upp á stóra sviðinu. Komst í gegnum niðurskurð á öllum fjórum risamótum í fyrra en gekk verr þegar í helgina var komið. Getur hæglega gert vel.
6. Xander Schauffele
Er klár í slaginn og getur klárlega unnið að eigin sögn. Aðrir eru ekki eins vissir um meiðslastöðu kappans. Vann bæði PGA-meistaramótið og Opna breska í fyrra en spurningin er hvort við fáum meistara til leiks eða ryðgaðan meiðslapésa.
5. Jon Rahm
Spilar glimrandi vel á LIV. En gekk agalega á risamótunum í fyrra. Átti titil að verja á Masters og lenti í 45. sæti. Komst ekki í gegnum niðurskurðinn á PGA-meistaramótinu og dró sig úr keppni á US Open.
Mætir Rahmbo í hefndarhug?
4. Viktor Hovland
Norsarinn knái. Skemmtilegur kylfingur og áhugaverður náungi, þó hann sé norskur. Vann Valspar-mótið nýlega þrátt fyrir að hafa sagt skömmu áður að honum fyndist hann hafa týnt sveiflunni. Ætlaði raunar ekkert að taka þátt, en vann svo bara.
Finnur hann sveifluna um helgina?
3. Scottie Scheffler
Var einstaklega stöðugur og vann ítrekað mót á síðasta ári. Hann hefur þó ekki unnið á þessu ári, ennþá. Smá ryðgaður en þrátt fyrir það aldrei verið fyrir utan topp 25 á árinu. Og var í öðru sæti á Houston Open á dögunum. Scheffler er efstur á heimslistanum, á titil að verja og skyldi engan undra að fyrsti sigur ársins kæmi um helgina.
2. Bryson DeChambeau
YouTube-kallinn. Öflugur á risamótunum í fyrra. Sjötta sæti á Masters, annað sæti á PGA og vann svo US Open. Misgóður á LIV en alls ekkert ólíklegt að hann stígi upp á stóra sviðinu, rétt eins og fyrrum erkióvinur hans Koepka.
1. Rory McIlroy
Kemur sama gamla romsan. McIlroy hefur ekki unnið risamót í áratug. En hann hefur unnið allt annað á meðan. Masters er eini risatitillinn sem hann á eftir til að ná í blessaða alslemmuna.
Er komið að því?
Hann hefur í það minnsta aldrei verið jafn ferskur að eigin sögn.
Sýnt verður beint frá Masters-mótinu á Stöð 2 Sport 4 klukkan 19:00 í kvöld og annað kvöld. Mótinu verður þá enn betur fylgt eftir um helgina.
