Björn Teitsson hefur verið ráðinn til starfa hjá Krabbameinsfélagi Íslands sem nýr kynningarstjóri.
Í tilkynningu kemur fram að Björn hafi víðtæka reynslu af kynningarmálum og miðlun.
„Hann var m.a. upplýsingafulltrúi Rauða krossins á Íslandi og fréttamaður á Fréttastofu RÚV. Síðastliðin tvö ár hefur Björn verið í mastersnámi í evrópskum borgarfræðum í Weimar í Þýskalandi. Áður hafði hann lokið BA-gráðu í sagnfræði og þýsku, auk diplómaprófs í menningarfræðum, alþjóðasamskiptum og CPLF-prófs í frönsku.
Björn kemur til með að sinna samskiptum við fjölmiðla og upplýsingagjöf og miðlun fyrir hönd Krabbameinsfélagsins með margvíslegum hætti. Björn hefur nú þegar hafið störf,“ segir í tilkynningunni.
Einnig segir að Björn sé 39 ára og í sambúð með Unu Kristínu Jónsdóttur textíllistakonu. Þá eigi hann sér margvísleg áhugamál á borð við matarmenningu og matreiðslu, skipulags-og samgöngumál og alls konar nytsamlegur sem ónytsamlegur fróðleikur um sögu og listir. „Skemmtilegast af öllu þykir Birni þó að spila körfubolta eða fara í göngutúra með labrador-hundinum Esju.“
