Formlega hættur hjá Twitter: „Ég er mjög ánægður að geta klárað mitt starf í gleði“

„Það er búið að leysa öll mál og ganga frá starfslokum þannig að allir séu sáttir. Twitter er og hefur verið uppáhaldssamskiptamiðillinn minn og ég er mjög ánægður að geta klárað mitt starf í gleði,“ segir Haraldur í svari við skriflegri fyrirspurn Vísis.

Mikið hefur verið fjallað um málefni Twitter eftir að auðjöfurinn Elon Musk keypti samfélagsmiðilinn og hóf róttækar breytingar á rekstri hans. Meðal þess sem hann gerði var að segja upp fjöldanum öllum af starfsmönnum Twitter. Meðal þeirra var Haraldur, sem starfað hafði hjá Twitter frá því að hann seldi fyrirtækinu hönnunarfyrirtæki sitt Ueno árið 2021. Hins vegar kom fljótt í ljós að starfslok hans voru hvorki klöppuð né klár.

Mikla athygli vakti þegar Haraldur bauð Musk birginn opinberlega og eins konar ritdeila hófst milli þeirra á Twitter. Auðjöfurinn ýjaði meðal annars að því að Haraldur hefði lítið gert í vinnunni og borið fyrir sig taugahrörnunarsjúkdóm sem afsökun fyrir því.

Loks fór það svo að Musk bað Harald afsökunar á ummælum sínum og bauð honum að koma aftur til starfa hjá Twitter. Haraldur kvaðst munu íhuga það.

Þá vakti nokkra athygli nýverið þegar Musk reyndi ítrekað að taka aftur upp þráðinn í samræðum þeirra á Twitter, án þessi að Haraldur gæfi þeim tilraunum nokkurn gaum.

Getur ekkert gefið upp um skilmála

Því hefur verið velt upp í fjölmiðlum víða að Musk hafi bakað sér mikil vandræði þegar hann ákvað að segja starfsfólki á borð við Harald upp, sem hafði ráðið sig til fyrirtækisins eftir að hafa selt því eigin fyrirtæki. 

Þannig hafi hann ekki íhugað að í starfslokasamningum þeirra gætu verið ákvæði um uppgreiðslu alls eftirstandandi kaupverðs fyrirtækjanna.

„Ég get ekki talað um skilmálana án þess að brjóta trúnað,“ segir Haraldur við fyrirspurn um skilmála starfsloka hans.

Ætlar ekki að sitja auðum höndum

Haraldur segir að þessi tímamót séu gleðileg enda sé alltaf gaman að ná að leysa hlutina vel og klára mál. Hann hafi nóg á sinni könnu þrátt fyrir að vera nú formlega hættur sínu aðalstarfi.

„Ég er með alls konar skemmtileg verkefni í gangi. Veitingastaðurinn Anna Jóna hefur verið opnaður, það eru að koma út fleiri lög og myndbönd frá Önnu Jónu Son. Indó, RRO, Hafnarhaus og fleiri verkefni eru að í fullum gír. Og svo erum við að plana skemmtilega ráðstefnu í haust sem ég held að muni vekja mikla athygli,“ segir Haraldur inntur eftir því hvað sé á döfinni hjá honum.

Rætt var við Harald í gær hér á Vísi í gær um eitt þessara verkefni, opnun veitingastaðarins Önnu Jónu.