Donnarumma varði tvö víti í vítakeppninni og PSG fór á­fram

Paris Saint Germain komst í kvöld áfram í átta liða úrslit Meistaradeildar Evrópu í fótbolta eftir 4-1 sigur á Liverpool í vítaspyrnukeppni á Anfield.

Ítalski markvörðurinn Gianluigi Donnarumma varði tvö víti Liverpool manna í vítakeppninni og Parísarliðið skoraði úr öllum sínum vítaspyrnum.

Donnarumma varði vítaspyrnur frá Darwin Nunez og Curtis Jones og úrslitin voru ráðin áður en Liverpool fékk að taka sína fimmtu og síðustu vítaspyrnu.

Paris Saint Germain vann leikinn 1-0 en þá stóð 1-1 samanlagt eftir 210 mínútur af fótbolta.

Liverpool vann fyrri leikinn 1-0 í París þrátt fyrir að Paris Saint Germain hafi verið miklu betra liðið og í kvöld snerist það að nokkru leyti við. Liverpool var miklu betra liðið í seinni hálfleik en tókst ekki að koma boltanum í netið og því þurfti að framlengja leikinn.

PSG skoraði markið sitt strax á tólftu mínútu og fékk vissulega færi til að bæta við mörkum í fyrri hálfleiknum. Það er fram að hálfleik en þá tóku Liverpool menn yfir í leiknum.

Leikurinn var annars stórkostleg skemmtun þar sem liðin fengu hvert færið á fætur öðrum því skyndisóknir Frakkanna voru alltaf mjög hættulegar.

Liverpool var eins og áður sagði miklu meiri þátttakandi í leiknum en í þeim fyrri í París þar sem þeir voru nánast í nauðvörn allan leikinn.

Þá lifði Liverpool af þökk sé stórbrotinni markvörslu Alisson en nú náðu Parísarmenn að skora strax á tólftu mínútu. Þar með var allt jafnt en í framhaldinu fengu liðin hver færið á fætur öðru.

Eina mark fyrri hálfleiksins var slysalegt en kom eftir góða og hraða sókn PSG. Ibrahima Konate ætlaði þá að bjarga fyrirgjöf en ýtti boltanum framhjá Alisson. Ousmane Dembélé nýtti sér þetta og sendi boltann í autt markið. Þar með var allt orðið jafnt samanlagt.

Leikmenn Paris Saint Germain fengu betri færi í fyrri hálfleiknum en í þeim síðari þá skipti Liverpool í annan gír.

Varnarmenn Parísarliðsins komust hvað eftir annað fyrir skot Liverpool manna. Flestir héldu að eitthvað yrði undan að láta en Parísarmenn héldu út. Þeir byrjuðu síðan framlenginguna á því að skapa hættu en Liverpool slapp þá með skrekkinn.

Bæði lið höfðu lagt gríðarlega mikið í leikinn og það hægðist á öllu þegar leið á framlenginguna. Parísarliðið var hættulegra en á endanum réðust úrslitin í vítakeppni.