Vara við svindlurum sem líkja eftir Mbl.is

„Stórárás á Íslendinga“ segir í færslu lögreglunnar á Facebook.

„Lögregla og aðrir sem fylgjast með netárásum hafa orðið varir við umfangsmikla tilraun til vefveiða á Íslendinga,“ segir í færslunni.

Undirbúningur glæpamannanna sé vandaður.

„Þeir byrja með auglýsingum á Facebook þar sem þeir hafa stolið myndum af þekktum Íslendingum. Tilgangurinn er að veiða fólk inn í falska fjárfestinga svikamyllu og þannig stela af fólki peningum.“

Þrjár auglýsingar eru nefndar sem dæmi um slíkt svindl.

„Best er að tilkynna þær til Facebook sem svindl en að öðrum kosti hunsa þær alveg. Ef þið klikkið á þær þá farið þið á falska síðu sem líkir eftir mbl.is en er það alls ekki og þaðan er verið að reyna að tæla ykkur yfir á svikasíður sem líkja eftir fjárfestingasíðum en hafa þann eina tilgang að svíkja af fólki peninga, engin raunveruleg fjárfesting á sér stað.“

Þessi glæpahópur hafi útbúið mikinn fjölda af þessu auglýsingum og jafnframt sett upp fjölda af netsíðum til að styðja við glæpinn.

„Umfangið bendir til þess að þarna sé vel skipulagður hópur glæpamanna að baki.“

Glæpamenn í sömu hugleiðingum, á eftir peningum almennings, hafa í gegnum árin birt gervifréttir á Facebook líkt og um fréttir af Vísi væri að ræða.