Rannsaka gögnin sem skera úr um hvort það verði loðnuvertíð

Kristján Már Unnarsson skrifar 19. febrúar 2025 21:42

Teresa Silva sjávarlíffræðingur, leiðangursstjóri loðnuleitarinnar, svarar spurningum Stöðvar 2 í brú Árna Friðrikssonar í dag. Bjarni Einarsson

Eftirvænting ríkir í loðnugeiranum um hvort nýafstaðin loðnuleit skili nægilegu magni til að unnt sé að gangsetja síðbúna loðnuvertíð. Vonin er talin veik en þó einhver.

Í fréttum Stöðvar 2 mátti sjá rannsóknaskipið Árna Friðriksson sigla inn til heimahafnar í Hafnarfirði í hádeginu eftir ellefu daga loðnuleit. Þetta er þriðja leitin sem efnt er til frá áramótum en fyrri leitir hafa ekki skilað nægilegu magni til að vísindamenn treysti sér til að mæla með loðnuveiðum.

Í útvegsgeiranum halda menn enn í þá veiku von að það gæti þrátt fyrir allt orðið loðnuvertíð. Mæligögnin sem vísindamenn komu með í land úr leiðangrinum í dag ráða úrslitum.

Rannsóknaskipið Árni Friðriksson að leggjast að bryggju í Hafnarfirði í dag eftir ellefu daga leiðangur.Bjarni Einarsson

Auk Árna Friðrikssonar tóku fiskiskipin Heimaey og Polar Ammassak þátt í leitinni sem að þessu sinni beindist að miðunum undan norðan- og norðvestanverðu landinu. Leiðangursstjóri var sjávarlíffræðingurinn Teresa Silva frá Portúgal. En sáu þau eitthvað af loðnu?

„Já, við sáum loðnu núna við Norðurland, í austur. Það var svolítið meiri kynþroska loðna sem við sáum þar en var ekki mikið í janúar þar.“

-En er þetta þá loðna sem þið voruð að sjá sem hefur ekki mælst áður? Þetta sé kannski viðbót?

„Já, þetta er ný loðna sem var að koma inn, já,“ svarar Teresa, sem er doktor í sjávarlíffræði.

Leiðangursstjórinn í klefa vísindamanna um borð í Árna Friðrikssyni.Bjarni Einarsson

Hún hóf strax eftir leiðangurinn í dag að rýna í gögnin ásamt samstarfsmönnum sínum hjá Hafrannsóknastofnun.

„Já, við erum að rannsaka gögn núna í dag og á morgun og kannski klárum það á morgun.“

-Og hvenær koma svo svörin?

„Kannski á morgun. Við sjáum til.“

En það er lítill tími til stefnu. Aðalhrygningarganga loðnunnar var í dag talin vera undan Þorlákshöfn. Loðnan er sennilega að komast í sitt allra verðmætasta form, að verða hrognafull rétt fyrir hrygningu.

Áhöfn Heimaeyjar VE-1, skips Ísfélags Vestmannaeyja, hefur í dag kannað loðnugönguna undan Þorlákshöfn.Vilhelm Gunnarsson

Leiðangur Árna Friðrikssonar var sá síðasti í loðnumælingum á þessari vertíð. Útgerðin sendi hins vegar fiskiskipið Heimaey út í dag til að mæla loðnugönguna við Þorlákshöfn.

-En er ennþá smávon um loðnuvertíð?

„Ég skal segja þeir ekki neitt núna. Bara, við sjáum til á morgun,“ svarar leiðangursstjórinn Teresa Silva og hlær.

Hér má sjá frétt Stöðvar 2:

Loðnuveiðar Sjávarútvegur Efnahagsmál Hafnarfjörður Vísindi Vestmannaeyjar